HAK KONDENA TAXISTA FAN FETO MINORIDADE

DILI - Diretór Asosiasaun HAK, Manuel Monteiro hatete, kazu fa’án labarik kontinua mosu tanba impaktu hosi lalenok estadu.

“Ami ko’alia nafatin katak, ukun na’in sira tenki sai nafatin ispelu ne’ebé di’ak, ispelu ne’e labele rahun. Sé bainhira rahun ona, ita leno-án la hetan, entaun importante liu mak ispelu estadu nian mak sai ispelu ne’ebé di’ak, buat sira ne’e impaktu mai hosi estadu rasik”, Monteiro informa ba diáriu ne’e iha nia kna’ar fatin, Kinta, (8/10).

Monteiro hatutan, ispelu estadu nian rahun uluk ona susar ba sidadaun sira atu hado’ok án hosi krime. Monteiro kondena maka’as ho autór ne’ebé tenta fa’án labarik feto idade minoridade ba ema seluk.

Maibé fukun ba kazu krime sira ne’e hotu iha governu, tanba governu troka ba dala barak ona, sosializasaun lei legal sira minimu liu, entaun povu rasik mós la-kumpriende ‘oinsa hakribi krime.’ 

Nia dehan, governu mak iha responsabilidade bo’ot ba krime trafiku umanu sira, tanba kauza hosi krime ne’e barak liu mai hosi kestaun ekonómia família nian.

Nia parte kestiona maka’as estadu tanba hasai hodi hamate povu, ne’ebé refere liu ba matebian Mauk Moruk, tanba ohin loron la-hetan justisa.

“Hahalok sira ne’e mak obriga sidadaun sira halo krime, fa’án ema ne’e krime. Estadu oho ema di’ak hela laiha investigasaun, Mauk Moruk mate laiha órgaun estadu ida mak atu halo investigasaun, ne’ebé krime ne’e ema la-hakfodak ona”, nia tenik.

Ba futuru atu halakon krime trafiku umanu, Monteiro katak, krime sira ne’ebé akontese iha pasadu tenki prosesu tuir dalan justisa inklui krime grave kontra umanidades hahú 1974 to’o 1999.

Maibé estadu halo polítika dalan ba justisa pasadu ne’e, entaun fó marjen ka fó lisaun ba sidadaun sira la-tauk komete krime iha Timor. Monteiro rekoñese lei iha atu prosesa kazu krime sira, maibé atu haforsa lei ne’e mak la-la’o.

Tanba tuir nia, intervensaun polítika hosi polítiku sira maka’as liu kompara ho desizaun hosi setór judisiáriu sira. Monteiro halo previzaun katak, ba futuru krime oi-oin sei mosu, tanba polítiku sira la haforsa lei.

“Lei mak proteze sidadaun sira, lei pensaun vitalísia ne’e mós abuza hodi ema nia moris diferente, tanba iha tiha ona entre ki’ak ho riku. Sidadaun hot-hotu hakarak haka’as-án ba moris di’ak”, Manuel Monteiro katak tan.

Maibé esforsu hirak ne’e la-atinji no husik de’it iha dalan klaran, buat ne’ebé konsidera la-di’ak mós ema halo legal.

“Kazu human traffic (trafiku humanu) ne’e krime, entaun tenki hetan atuasaun hosi ita nia instiuisaun seguransa sira, maibé atuasaun tuir nafatin regra, la’o ho forsa esesivu hodi halo kapturasaun e depois aselera prosesu investigasaun”, nia afirma.

Diretór ne’e mós ejize ba parte polítika atu aselera prosesu investigasaun hodi emkamiña ba Ministériu Públiku hafoin prosesa autór ne’e ba tribunál tuir dalan legal.

Sikun seluk, Grupu Mulher Parlamentar Timor-Leste (GMPTL) kestiona maka’as kona-ba atetude hosi Timor-oan sira ne’ebé involve iha atividade trafiku humanu ne’ebé fó ameasa tebes ba labarik minor idade sira nia futuru.

Deputada Jacinta Abucau Pereira hatete, la-satisfeitu ho atetudi ne’ebé komete hosi mane sira hodi fa’án labarik feto sira ne’ebé ho idade ki’ik.

“Ema sira ne’ebé fa’án labarik feto sira ne’e laiha ona moral, nia la-hatene nia ferik-oan mos iha uma no nia oan feto, familia no nia jerasaun ne’ebé mak tuir mai, depois ita mós haree ba ema hanesan ne’e familia laiha responsabilidade”, Jacinta hato’o lamentasaun iha Parlamentu Nasionál, Kinta, (8/10).

Deputada bankada Partidu Demokratika ne’e rekoñese, atetude ne’ebé lori labarik minor idade tama iha vida nakukun, ne’e mosu la’os arbiru de’it maibé fatores barak hanesan ekonómia. Maibé, deputada ne’e dehan, importante mak iha konsensia hodi labele obriga ema seluk.

Jacinta hatutan, sidadaun hotu tenki iha responsabilidade ba futuru nasaun ida ne’e nian, tanba ne’e ema hotu tenki proteje no asegura futuru, li-liu ba labarik ki’ik sira.

“Kuandu halo atetude hanesan ne’e, mo’e bo’ot ba nasaun Timor ne’e no hatun dignidade feto nian”, Jacinta katak.

Ho situasaun sira ne’ebé mak durante ne’e sempre mosu li-liu kona-ba trafiku humanu, abortu no violasaun seksual hasoru labarik feto ho minor idade, deputada ne’e dezafia entidades hotu, li-liu inan aman atu kontinua tau matan no fó atensaun ba oan sira.

“Hanesan familia iha mós responsabilidade bo’ot, sosiedade sivil, autoridade lokal ne’e mós tenki tau responsavel”, deputada ne’e katak tan.

Hanesan GMPTL, Jacinta dehan, la’os de’it atu haree ba atividade hanesan deputada iha uma fukun, maibé sira sempre akompaña atividades sira iha rural.

Nune’e, ho situasaun sira ne’ebé fó ameasa ba direitu liberdade labarik minor idade sira, GMPTL sempre fó hanoin ba entidades hotu hodi kontinua tau matan ba labarik sira.

“Ita labele ona de’it ba Igreja mak atu fó atensaun maka’as, maibé ita hotu nia responsabilidade atu haree, bele evita no labele buras”, deputada ne’e haforsa.(vas/lj8/lj13)

Timor Post