PROBLEMA EDUKASUAN HAMOE PR TAUR IHA POVU NIA OIN

Problema Edukasaun nian hamoe Prezidenti Repúblika (PR) Taur Matan Ruak iha komunidade nia oin, tanba maske eis Primeiru Ministru Kay Rala Xanana Gusmão hola tiha ona karteiras rihun atus ida atu fahe ba eskolas hotu, maibé to’o agora Ministériu Edukasaun sei budu hela karteiras no meza sira ne’e iha Dili.

Taur Matan Ruak dehan, kona-ba edukasaun sai problema bo’ot, tanba to’o agora sei iha labarik rihun atus ida mak sei tu’ur hela iha rai.

“Tanba ne’e mak ha’u mo’e, maibé ha’u aponta ita bo’ot nia preokupasaun hodi hato’o ba sira iha Governu,”dehan PR Taur Matan Ruak bainhira dialogu ho komunidade iha Suku Matorek, Postu Administrativu Turiskai, Munisipiu Manufahi, hodi responde lamentasaun povu nian kona-ba to’o agora labarik sira se tu’ur hela iha rai, Sabadu (14/11).

Xefi Estadu ne’e informa katak, tinan kotuk, nia ko’alia ona ho eis Primeiru Ministru Xanana Gusmão kona-ba problema ida ne’e, no Xanana responde kedas hodi sosa kalteiras no mejas rihun atus ida resin atu fahe ba eskolas hotu ne’ebé mak kalteiras ho mejas laiha.

Maibé Taur Matan Ruak dehan, nia mós lamenta tebes, tanba to’o agora kalteiras ho mejas sira ne’e, se budu hela iha Dili.

“Maun Xanana dehan mai ha’u katak, Ida ne’e lolos servisu Ministru nian, maibé ha’u promete atu sosa kalteiras no meja rihun atus ida resin hodi fahe ba eskola hotu,” informa Taur Matan Ruak.

Xefe Estadu ne’e dehan, nia triste no mo’e, tanba kalteras no meja sira ne’ebé sosa tiha ona ne’e, Ministériu Edukasaun seidauk fahe ba eskolas sira ne’ebé persija.

“Laiha razaun para kadeira no meja sira ne’e rai iha Dili, ida ne’e so ema baruk ten mak halo ida ne’e, alas an tu’un sa’e, hodi rai hela buat sira ne’e iha Dili,” lamenta Taur Matan Ruak.

Taur Matan Ruak dehan, nia la’os atu nega servisu ne’ebé mak Mnistériu kompetente halo ona durante ne’e, dalabarak la’o sala.

Maibé Taur Matan Ruak husu sira atu pasiesia oit oan, tanba problema edukasaun ne’e, problema ne’ebé bo’ot tebes iha Timor Leste.

Taur Matan Ruak esklarese, iha inan aman barak mak kestiona katak, bee no sintina iha eskola sira ne’e mos, se iha problema barak, maibé Governu osan laiha atu rezolve lalais problema sira ne’e.

“Ba porjetu bo-bo’ot, Estadu iha osan atu halo, maibé ba de’it bee no sintina ne’e, Governu taka matan,” informa Taur Matan Ruak.cos

Jornal Nacional