Indonézia identifika kompañia 16 maka sai hanesan responsável ba inséndiu ne’ebé kria suar tóxiko

Indonézia identifika ona empreza 16 maka sunu plantasaun iha illa Sumatra no Bornéu hodi kria suar tóxiko ba to’o nasaun sira ne’ebé besik ho nasaun refere, tuir imprensa lokál fó sai ohin. 

Ministra Ambiente, Siti Nurbaya Bakar, halo anúnsiu atu hapara atividade hosi kompañia hirak ne’ebé parte bot nu’udar produtór ba pasta hosi surat-tahan, no iha fali parte seluk governu sei atu foti medida legál.

Ministra fó esklaresimentu katak suspensaun ba atividade hirak ne’e sei bele aplika karik iha tinan rua oin mai empreza hirak ne’e fó pasu di’ak hodi evita inséndiu foun.

Empreza hirak ne’e, tinan-tinan tenke sunu hodi hamoos sira-ninia tos, maibé tinan ne’e maka piór liu hafoin akontese fenómenu El Niño.

Situasaun ne’e sai piór liu hodi iha 08-outubru, Prezidente Joko Widodo husu ajuda ba Japaun, Malázia, Rúsia no Singapura atu hapara ahi nomós suar tóxiko ne’ebé kontamina ba to’o rejiaun refere.

Inséndiu ne’e halo Indonézia lakon dolár milloens 16.100 (euros milloens 14.589), ekivale ba 1,9% hosi PIB ka dobru liu hosi kusti hodi harii hikas Aceh, norte illa Indonézia Sumatra, ne’ebé hetan estragu tanba tsunami iha 2004.

SAPO TL ho Lusa – Foto: @borinho