LIQUIÇA
(TATOLI) - Restus mortais hosi saudozu sira ne’ebé luta ba libertasaun nasionál
hamutuk ema na’in
260 haloot ona iha Jardim dos Herois Suku Dato, Postu Administrativu
Liquiça Vila, Munisípiu Liquiça.
Restus
mortais hamutuk 280 hosi Munisípiu Liquiça maka Komisaun Organizadora prepara
maibé na’in ualu seidauk bele haloot tanba sei deskunhesidu hela. Oras ne’e,
Governu liuhusi Ministériu Solidariedade Sosiál (MSS) iha prosesu
identifikasaun ba restus mortais ualu refere molok haloot.
Seremóna
haloot restus mortais hirak ne’e organiza hosi Ministériu Solidariedade Sosiál.
Antes haloot, hala’o uluk misa solene ne’ebé diriji hosi Bispu Dioseze Maliana,
Don Norberto Amaral iha tuku 9H30.
Iha
nia omília, Don Norberto hateten ita ema ne’ebé sei moris debe hela saudozu
sira ne’ebé mate ona. Debe la’ós tenki selu ho osan maibé presiza ita nia orasaun
hodi harohan ba sira no banati tuir sira nia espíritu patriotizmu ne’ebé sira
hatudu ona iha tempu luta ba libertasaun.
Bispu
informa katak sira ne’ebé mate ona dedika sira nia vontade ba funu hamutuk ho
maluk sira seluk ne’ebé sei moris maka ikus Timor-Leste konkista ninia
libertasaun nasionál hosi okupasaun estranjeiru.
“Sira
ne’e merese ita fó ita nia valorizasaun boot. Sira halo funu haluha tiha
sira nia interese privadu no família, han de’it kumbili, kulu tunu no fehuk
fuik iha ailaran hodi aguenta moris para halo funu,” líder Igreja Katólika ne’e
haktuir.
Partisipa
iha seremónia haloot restus mortais ne’e maka Prezidenti Repúblika, Dr.
Francisco Guterres Lú-Olo ho nia espoza, Primeiru Ministru Dr. Rui Maria de
Araújo, membru Governu sira, membru Parlamentu Nasionál, veteranu sira,
estudante sira nomós komunidade Munisípiu Liquiça rihun ba rihun.
Jornalista:
Xisto Freitas | Editór: Manuel Pinto
Foto:
Don Norberto Amaral fo bensa ba rate restus mortais, iha Liquiça, Kuarta
(14/06). FOTO TATOLI: Xisto Freitas
Sem comentários:
Enviar um comentário