Kompleksidade Problema Veteranu iha Timor-Leste

Fundasaun Mahein (FM), 16 Dezembru 2015

Liu husi Mahein Nia Hanoin Nu. 09 (Versaun Tetum.pdf) kona-bá Problema veteranu sai hanesan asuntu ne’ebé to’o ohin loron seidauk iha solusaun lolós no sai kompleksu liu tan tanba Estadu Timor-Leste seidauk identifika lolós hodi determina kona-bá sé lós no ema nain hira maka kualifikadu hodi hetan estatutu nu’udar veteranu. Maske governu kria esforsu hodi harii komisaun no lei barabarak hodi rejista no fó omenajen hodi foka iha kompensasaun ba veteran.

Esforsu hodi rezolve problema veteranu nian la’ós deit agora maibe desde Administrasaun Tranzitoriu Nasoens Unidas nian ka UNTAET husi tinan 2001 liu husi programa FALINTIL Reinsertion Assistance Program – FRAP no Recovery and Stability Program for Ex-Combatentes and Communities in Timor-Lorosa’e – RESPECT hodi fo asistensia sosial veteranus sira. Maibe programa ne’e la rezolve problema kona-bá oinsa veteranu ba longu prazu nian.

Hafoin programa rua ne’e nian, governu defenitivu simu nia mandatu harii komisaun ba rejistrasaun, verifikasaun, validasaun ba dadus veteranus nian hodi define ka determina nivel asistensia no valorizasaun ba veteranu sira. Komisaun sira ne’ebé governu harii desde tinan 2002 to’o 2006 maka hanesan Comissão para os Assuntos dos Antigos Combatentes – CAAC, Comissão para os Assuntos dos Veteranos das Falintil – CAVF, Comissão paraos Assuntos dos Quadros da Resistencia – CAQR, Comissão de Validação de Dados – CVD, Comissão de Consolidação de Dados – CCD), Comissão de Homenagem, Supervisão de Registo e Recurso – CHSRR.

Husi komisaun hirak ne’e, Comissão de Homenagem, Supervisão de Registo e Recurso – CHSRR estabelese ikus liu iha tinan 2006 to’o agora ho nia serbisu atu superviziona rejistu ba dadus no simu rekursu ba reklamasaun husi veteranu sira.

Problema veteranu sai kompleksu hakait ho pratika favoritismu no familiarismu iha prosesu administrativuveteranu nian no influensia partidaria iha prosesu sira ne’e rasik. Ho nune’e fasilita mos manipulasaun informasaun ka dadus kona-bá sira nia involvimentu hodi hetan grau ne’ebé boot no simu pensaun mensal. Hetok aat liu, mosu veteranu falsu hodi hetan asistensia ne’ebé governu oferese.

Relasiona ho deskontentementu veteranu sira ne’ebé kontinua sai marjinalizadu husi politika pensaun nian. Ho hanoin seluk katak ema ne’ebé uluk kolabora ho inimigu hetan grau rekuiñesementu ne’ebé boot liu duke ema hirak ne’ebé kontribui ba luta libertasaun nasional.

Impaktu seluk ba finanseiru estadu nian, iha ne’ebé fundu petrolifeiru hanesan rekursu úniku hodi finansia atividade governu nian inklui selu veteranus no kombatente sira.

Orsamentu ne’ebé selu veteranu sira ho montante ne’ebé boot kompara ho setor seluk. Haree husi alokasaun orsamentu no istimasaun Governu Timor-Leste kona-bá veteranu iha futuru fo implikasaun maka’as ba orsamentu Estadu. Realmente rekursu Kitan no Bayu-Undan maka durante ne’e fo osan ba Timor-Leste. Maibe, estudu sira relata ona katak Kitan sei maran iha tinan 2016 no Bayu-Undan sei maran entre 2020 ka 2022. Mosu pergunta sekarik mina-maran no osan hotu oinsa selu pensaun veteranu? Oinsa ho estabilidade iha rai-laran?

Rekomendasaun

Ho ida ne’e FM rekomenda:

1. Rekomenda ba Komisaun Homenagen atu halo verifikasaun no validasaun dadus veteranu hodi nune’e bele garante edital ne’ebé kualidade no justu. Nune’e mos halo investigasaun ba ema hirak ne’ebé halo falsifikasaun dokumentu atu hetan pensaun veteranu nian.

2. Rekomenda ba Governu atu halo revizasaun ba lei pensaun ba veteranu no kombatente libertasaun nasional hodi nune’e labele hamosu diskriminasaun kona-bá pensaun nian. Nune’e mos lei Estatutu Kombatente hodi nune’e labele minimiza ema nia kontribuisaun luta ba libertasaun nasional.

3. Rekomenda ba Governu atu hari’i Konsellu Nasional Veteranu atu bele apoiu Estadu hodi rezolve problema. Nomos halo prosesu legal ba veteranu “falsu” sira ne’ebé durante ne’e halo falsifikasaun dokumentu hodi hetan pensaun no kondekorasaun.

Atu hetan informasaun kle’an liu kona-bá asuntu ne’e bele kontaktu:

Nélson Belo, Diretor Ezekutivu
Email: direktor.mahein@gmail.com
Telemovel: (+670) 78316075 no 77561184
Website: www.fundasaunmahein.org