PR TAUR VETA OJE 2016

DILI - Prezidente Repúblika Demokratiku Timor-Leste, Taur Matan Ruak, Tersa (29/12/2015) veta proposta Orsamentu Jeral Estadu (OJE) ba tinan 2016, neebe haruka mai husi Parlamentu Nasional (PN).

Veta nee akompana ho mensajem ba Parlamentu Nasional neebe fundamenta razaun lubun ida ba veto politiku, tuir art. 88.º Lei Inan. Prezidente Republika espoe tiha ona nian diskordansia konaba prioridade sira iha OJE ba tinan 2016, durante debate orsamentu iha Parlamentu Nasional.

Iha tempu neeba, Prezidente Republika manifesta diverjensia hasoru proposta iha OJE ba tinan 2016 ne’ebe aumenta investimentu iha projetu sira infra-estrutura nian neebe laiha retornu efetivu, hanesan ZEESM ka projetu Tasi Mane nian no hatun fali despeza publiku iha setor sira hanesan Saude, Edukasaun no Agrikultura.

Iha okasiaun nee, Prezidente Republika mos alerta tiha ona ba nesesidade atu promove investimentu iha bee mos no saneamentu baziku atu nunee hadiak kondisaun baziku moris nian.

Iha mensajem ida nee mos,Presidenti Republika Taur Matan Ruak alerta ba nesesidade atu garante dezenvolvimentu ida ke sustentavel ba Nasaun neee, liu hosi aumenta reseitas domestiku no hamenus gasta osan hosi Fundu Minarai, neeebe kada tinan ita gasta liu fali rendimentu sustentadu estimadu (RSE), liu dala rua.

Fundu de Infraestruturas foun neebe estabelese iha OJE ba tinan 2016, neebe hases-an hosi regras Lei do Orçamentu e da Jestão Financeira konaba fundos especiais, mos sai nudar materia analiza hau nian, liu hosi mensajem ba Parlamentu Nasional,”dehan Presidente Republika Taur matan Ruak, liu husi komunikadu imprensa neebe, STL simu iha edefisiu STL, Osindo (Surikmas), Dili, Tersa (29/12/2015).

Antes nee Presidente bankada CNRT iha Uma Fukun PN, deputadu Natalino dos Santos hatete, Pozisaun CNRT kuandu Prezidente Republika Taur Matan Ruak Veta OJE 2016, nee kompetensia prezidente, maibe husu Prezidente Republika atu hare ho realistiku ba orsamentu. Informasaun kompletu iha STL jornal no STL Web, edisaun Kuarta (30/12/2015). Carme Ximenes

Suara Timor Lorosae