TINAN 500 PORTUGAL-OAN SIRA TO’O IHA TIMOR-LESTE

Rui Correia sei dada-besik Portugal ho Timor-Leste ho motór

Portugál-oan Rui Correia iha finál fulan ne’e sei hahú halo aventura ida ho motór, hosi Lisboa mai to’o iha Lifau, enklave Oecusse, hanesan fatin ne’ebé misionáriu dahuluk nomós navegadór portugés sira to’o iha tinan 500 liu ba. 

Viajen ne’e sei hala’o ho kilómetru 22.184 hosi nasaun 18, nomós sei atravesa área maritime hanesan Malázia - Sumatra, Sumatra - Java, Java - Bali, Bali – Lombok, Lombok – Sumbawa, Sumbawa – Flores no Flores – Timór.

Rui Correia, ne’ebé oras ne’e daudaun hanesan asesór iha Ministériu Administrasaun Estatál, Timor-Leste esplika katak viajen ne’e hanesan “símbolu amizade nomós solidariedade ne’ebé kria uniaun ba povu rua”.

Sei buka apoiu adisionál ba viajen refere, hodi garante katak objetivu adisionál maka fó kontribuisaun ba serbisu ONG SUL-Timor, liu-liu ba iha projetu apoia eskola ida iha Dili.

Iha “pré-viajen”, Rui Correira sei prekore hosi Guimarães-Lisboa, ho kilómetru 547, liu hosi Porto, Coimbra, Fátima, Cabo da Roca no Sintra.

Sai hosi Padraun Deskobrimentu, 30-agostu hodi ikus mai to’o iha Lifau, Oecussi, koinside ho selebrasaun 28-novembru, hanesan loron ba komemorasaun tinan 40 hosi independénsia Timor-Leste.

Perkursu hosi viajen europeu – ho kilómetru 4.395 – sei liu hosi España, Fransa, Mónako, It’alia, Eslovénia, Kroásia, Sérvia, Bulgária ho Turkia.

Perkursu dahuluk iha parte aziátika maka hosi Istambul – Nova Deli (kilómetru 7.283) no sei liu hosi Iraun – Pakistaun, depois halo ligasaun entre Nova Deli – Malaka (kilómetru 6.225), ho pasajen hosi Birmánia ba Tailándia.

Depois Rui Correia sei atravesa ba iha arkipélagu indonézia, nomós liu tan ba fatin seluk hanesan Dumai, Lampung, Jakarta, Bandung, Yogyakarta, Banyuwangi, Denpasar, Mataram ho Bukit Raya.

Hafoin liu tiha fatin hirak ne’e ho kilómetru 3.437, sei hakat ba Lombok – Flores ho kilómetru besik 480 no Flores – Dili, kilómetru 365.

Destinu ikus hosi viajen ne’e maka to’o iha Dili, maibé parajen simbólika maka iha Oecussi.

SAPO TL ho Lusa - video RTTLep