PN KONSIDERA IGREJA KONTRIBUI BA INSTABILIDADE – HEIN REZULTADU FINAL IJE

Parlamentu Nasional (PN) konsidera igreja mos kontribui ba instabilidade tanba halo tentasaun hodi fasilita ema estranjeirus sira hetan sertidaun baptismu.

Membru Parlamentu Nasional husi bankada CNRT, Cesar Valente “Pilotu”, hateten, jogador naturalizasaun ne’ebe hetan sertidaun baptismu nudar falhasun boot ne’ebe igreja komete. Tanba ne’e, tenke buka tuir ema se maka fasilita sertidaun ne’e ba Brazileiro nain 7 nudar jogador naturalizasaun.

“Ne’e duni ita iha ona akordu ho SantaSe kona ba kestaun Igreja no Estado, katak hanesan Bispo ka Padre sira komete krime hanesan ema nia tenke ba hatan iha tribunal, sira ne’ebe fo domentus ne’e mos tenke hatan tuir krime ne’ebe nia halo, asuntu hanesan ne’e tenke investiga para hodi hare verasidade lolos iha ne’ebe, ohin loron religiaun sira mos gosta hatun malu,” dehan deputado Cesar Valente ba Jornalista sira iha uma fukun PN, Kuarta (06/01/2016).

Reprezentante povu ne’e dehan, kuandu investiga rezultadu tenke fo sai ba publiku hodi hatene.

“Falsifikasaun domentus ba sidadaun hanesan ba jogadores sira husi rai liur mai okupa fali ne’e halakon vontade ita nia jogador sira no mos hatun tiha joven sira nia prestasaun talentu ne’ebe mak durante ne’e esforsu teb-tebes hodi ba partisipa iha eventu sira hodi TL nia naran,” dehan nia.

Nia dehan tenik, maske deskonfia Igreja balun fasilita sidadaun ba jogador naturalizasaun sira ne’e, maibe sarani nafatin tau fiar ba igreja, tanba sarani iha fiar ne’ebe mak bot teb-tebes, se pesoal ruma mak halo sala nia duni mak responsabiliza ninia aktu ne’e hodi ba hatan tuir lei.

Iha fatin hanesan, deputado bankada FRETILIN, Manuel castro realsa tan katak, kona ba Paroquia balun fasilita sertidaun ba jogador naturalizasaun, kuandu investigasaun hatudu ona katak sira mak fasilita tenke kumpri saida mak investigasaun ne’e halo.

“Hau hanoin igreja mesak deit mak iha hanoin atu fasilita, maibe iha mos oknum balun hakarak halo ida ne’e husu responsabilidade ba sira, tenke halo investigasaun ba sira, se karik sala tenke kumpri tuir lei, atu halo investigasaun mos ba iha oknum paroquial ne’e kompetensia ministeriu publiku,” dehan deputado Castro.

Hein rezultadu final IJE

Nune’e mos, Governu dada’uk ne’e, hein hela rezultadu auditoria final husi Inspetor Jeral Estadu (IJE) hodi bele foti desizaun ba jogador naturalizasaun hitu (7) husi Brazil ne’ebé mak agora dada’uk ne’e joga hela iha ekipa nasionál Futebol Timor Leste nian.

Sekretáriu Estadu Juventude no Desportu, Leovigildo da Costa Hornay informa katak, kona-ba jogador naturalizasaun na’in 7 husi Barazil ne’e, Primeiru Ministru mak sei foti desizaun.

“Sekretáriu Estadu Juventude i Desportu hein rezultadu orgaun autonomia Inspetur Jeral Estadu nian, atu nune’e halo nia ezersisiu, i rezultadu saida mak mosu, ha’u hanoin ida ne’e kompetensia inspetur nian atu fó sai,”dehan Leovigildo da Costa Hornay ba jornalista sira iha Palasiu Prezidensial Aitarak Laran Dili, hafoin hasoru malu ho Prezidente Repúblika Taur Matan Ruak, Kuarta (06/01).

“Ha’u hanoin kona-ba ida ne’e, (Jogador naturalizasaun na’in 7 ne’e) Primeiru Ministru ko’alia ona,” katak nia.

Nia hatutan, Governu liu husi SEJD simu, karik iha rekomendasaun balu ne’ebé hakarak atu Governu hadi’a buat balu. Maibé Leovigildo da Costa Hornay dehan, di’ak liu hot-hotu hein rezultadu husi auditoria parte IJE nian, tanba relatoriu final Primeiru Ministru mak iha kompetensia atu ko’alia husi Parte Governu nian.

Antes ne’e, Inspetor Jeral Estadu (IGE), Francisco de Carvalho informa katak, jogador naturalizasaun nain 7 husi Brazil ne’ebé mak joga iha ekipa selesaun nasionál la’os sidada’un Timor-oan, tanba latuir rekezitus.

To’o notisia ne’e hatun siedauk hetan konfirmasaun husi parte Igreja kona ba deskonfia fasilita sertidaun ba jorgador naturalizasaun sira husi Brazil ne’e. Mia/cos

Jornal Nacional