PR TAUR : SEI LA RETIRA DESIZAUN

Prezidenti Repúblika Taur Matan Ruak, deklara katak sei la muda nia desizaun ne’ebé mak foti hodi halo nomeiasaun ba Xefi Estadu Maior das Falintil Forsa Defeza Timor Leste (F-FDTL) foun. Tanba desizaun ne’e la’os demisaun ba Lere maibé ezonerasaun.

“Ne’e bolu dehan ezonerasaun, tanba tuir lei Xefi Estadu Maior Jeneral, Vise Xefi Estadu Maior Jeneral, no Xefi Estadu Maior sira na’in 3 ninia mandatu hotu iha Outubru, entaun sé mandatu hotu tenke iha fatin 2 ou mandatu hotu sira sai foti seluk ou halo extensaun,” deklara Xefi Estadu Taur Matan Ruak, iha diálogu komunitária iha Suku Fatubou, Postu Administrativa Hatolia, Munisípiu Ermera, Tersa (16/02), hodi responde ba preokupasaun komunidade nian, no mós reprezentante povu iha parlamentu ne’ebé husu ba PR atu altera ninia desizaun.

Iha diálogu komunitária ne’e, Xertorio Madeira hanesan komunidade suku Fatubou, hateten katak, sente preokupadu tebes ho situasaun aktual ne’ebé mak akontese dadaun iha rai laran, liu husi karta demisaun ne’ebé mak Prezidenti Taur Matan Ruak fó ba Maior Jeneral Lere Anan Timor, tanba demisaun ne’e bele hamosu implikasaun ba Timor.

“Durante ne’e ami rona katak, iha televizaun fó sai ona karta demisaun ba Sr. Lere Anan Timur, karik nia demisaun, nia simu ho kontente ka mosu implikasaun ruma ba ita Timor,” dehan Certorio Madeira.

Prezidenti Repúblika Taur Matan Ruak hateten katak, desizaun ba Jeneral Lere Anan Timor ne’e, la’os demisaun.

Tanba ne’e Taur Matan Ruak dehan, nia prontu para responsabiliza nia desizaun ida ne’e, no sei la retira fali.

Xefi Estadu ne’e esplika katak, Prezidenti desidi ona atu Jeneral Lere hakotu ninia misaun, foti Jeneral Meno ba fali ninia fatin, ne’ebé Governu sei koalia, mas Prezidenti toma tiha ona desizaun.

“Ohin Certorio dehan, Jeneral Lere keta halo problema karik, Jeneral Lere lahalo problema, tanba ita halo funu ne’e la’os para Jeneral Lere sa’e Jeneral, ou Matan Ruak sa’e Prezidenti, ita halo funu para moris di’ak, tanba ne’e nia sei lahalo problema, i nia hatete ona sei lahalo problema,” katak Taur Matan Ruak.

Xefi Estadu ne’e dehan, sé Jeneral Lere la halo ona problema, nein Timor oan sira iha Forsa laran bele halo problema.

“Ha’u mós uluk Jeneral, Komandante tinan 24, Jeneral tinan 10, mas uluk lasu Governu lakohi ha’u sai, Prezidenti Governu hakarak ha’u labele sai, maibé ha’u dehan ha’u sai, tanba sai Jeneral Lere, Jeneral Meno, Koronel Falur sira idade bo’ot liu ha’u, ha’u tinan ki’ik liu, sira 60 resin, ha’u Outubru mak ha’u 60,” katak nia.

Taur Matan Ruak hatutan, organizasaun ne’ebé depende ba ema ida de’it ne’e hotu ona maibé, depende ba regra no lei.

Taur Matan Ruak garante katak, desizaun ne’e sei la hamosu problema, karik iha problema mós, nia nia prontu atu rezolve, tanba kuandu tauk atu rezolve problema ne’e, diak liu lalika ukun an.

“Ita dehan kumpri lei, mais lakumpri lei halo nusa labele, i la’os Prezidente mak ajuda mak tenke ajuda viola fali ita nia lei no regulamentu sira ne’ebé iha, tanba mandatu hotu iha Outubru, Novembru, Dezembru i Janeiru, Fevereiru, fulan 5 ona lahetan solusaun ba Jeneral sira nia problema nee,” Taur Matan Ruak fundamenta.cos

Jornal Nacional