Odete: Distribuisaun Tuir Pedidu

Diretora Jeral Servisu Autonomo Medikamentus e Ekipamentus Saude (SAMES), doutora Odete Maria Freitas Belo, hateten falta medikamentus iha fasilidades saude, tanba submisaun pedidu tarde.

Nia dehan, distribuisaun medikamentus ne’ebe SAMES halo durante ne’e bazeia ba pedidu ne’ebe tama, tanba ne’e husu jerente ospital referral sira no saude munisipio sira atu hato’o pedidu antes stok out. 

“Ami responde tuir pedidu ne’ebe tama iha SAMES, ami la halo distribuisaun bainhira laiha pedidu ida mak tama,” Diretora Belo hateten via telephone. 

Nia informa, iha tipu pedidu tolu mak SAMES iha ; mak hanesan pedidu regular (kada fulan), pedidu emergensia no pedidu extra katak jerente sira bele advans aimoruk ne’ebe presiza maibe ho kuantidade ki’ik. 

Kona ba falta aimoruk iha Ospital Referal Baucau (ORB), nia dehan, sira simu pedidu husi Ospital Baucau iha dia 29 Marsu 2016, entaun sira presiza tau iha sistema no prepara aimoruk sira ne’ebe presiza molok halo distribuisaun. 

Iha parte seluk, membru Komisaun F (saude, edukasaun, kultura, veteranus no igualdade jeneru), Deputada Bendita Magno, kestiona servisu SAMES nian tanba durante ne’e sempre akontese falta aimoruk iha fasilidade saude sira. 

“Iha Ospital Referal Baucau, ami identifika 58 items medikamentus mak laiha (stok out) inklui mos aimoruk esensial sira,” Deputada Magno levanta iha plenaria Parlamentu Nasional. 

Kona ba items aimoruk ne’ebe stok out, nia la temi klaru aimoruk nia naran, maibe aimoruk sira ne’e kategoria ba aimoruk esensial hanesan antibiotika no aimoruk sira fo ba ema depois halo operasaun. 

Alende ne’e, nia dehan, Ospital Referal Baucau mos falta reagente atu halo teste ba ema nia ran.

The Dili Weekly