LabNas Hatama Reseitas $84,000 ba Estadu

Diretor Laboratorium Nasional (LabNas) Ministeriu Obras Publik Transporte e Komunikasaun (MOPTK), Saturnino Gomes, hateten iha tinan kotuk (2015) sira konsege hatama reseitas por volta de 84 mill ba kofre estadu.

Nia dehan, iha tinan 2014 LabNas konsege hatama reseitas ba estadu hamutuk $30 mil deit, tanba ne’e kompara ho tinan 2015 iha duni progressu.

“Ami nia manajemen ne’e diak no iha progresu kada tinan,” Diretor Gomes hateten.

Nia hatutan, osan hirak ne’e hetan husi kompania nasional no internasional ne’ebe konsege halo testu iha laboratorium nasional. “Iha 2015 por volta kompania atus ida resin mak mai halo testu iha ne’e,” nia dehan.

Kompania hirak ne’e, nia hateten, mai halo testu ba besi beton, alkatraun no rai, maibe iha kompania balun mos la halo testu iha laboratorium nasional, tanba sira iha laboratorium privadu.

“Halo testu hotu mak sira fo mai ami hodi ami verifika fali,” nia dehan.

Iha parte seluk Membru Parlamentu Nasional, Deputada Albina Marcal, rekonese no konsidera ne’e hanesan progresu servisu ne’ebe mak Diresaun Nasional Laboratorium Nasional halo ona iha kada tinan.

“Ita apresia, mesmu sira hanesan dirasaun ki’ik ida maibe sira bele hatama reseitas ne’ebe mak natoon ba estadu,” nia apresia.

Bazea ba servisu ekipa LabNas ne’ebe durante ne’e la’o diak, nia sujere, ba Ministeriu Obras Publik Transporte e Komunikasaun atu tau matan ba difikuldades no problemas ne’ebe mak sira infrenta.

“Fo kapasitasaun ne’ebe mak masimu, oferese ekipamentus ne’ebe sufsiente inklui fasilidade de apoiu servisu ne’ebe adekuadu,” nia sujere.

Iha parte seluk komunidade Marcal Fernandes, hateten ekipa tekniku husi Laboratorium Nasional ne’e durante ne’e hala’o hela nia knar diak, maibe seidauk masimu.

“Lolos ,sira tenke perkore hotu obra ne’ebe mak la’o hela, tanba iha obra balun sira la ba haree ida,” nia kritika.

The Dili Weekly