Arguidu Tenke Hakribi Krime

DILI - Arguidu sira neebe mak hetan ona liberdade husi tribunal, tenke hakribi violensia para la bele halo tan krime hasoru ema seluk. Hodi nunee ba futuru labele mai hatan tan iha uma lulik ida nee, hodi hatodan imi nia pena.

Liu husi audensia julgamentu juiz Antoninho Gonçalves husu ba arguidu sira neebe mak hetan liberdade ka absolve husi tribunal atu hakribi violensia iha futuru. Para nunee ba oin labele halo tan krime iha komunidade sira nia let. Tanba krime la lori valor diak ba ema nia moris, maibe lori todan iha nia kaabas leten bainhira mai hatan iha tribunal.

Juiz tatoli liafuan nee hodi fo hanoin fali ba arguidu sira neebe mak hetan absolve no no liberta husi prizaun atu labele kontinua tan ho sira nia hahalok hanesan iha futuru. Sekuandu la hakribi violensia, no nafatin kontinua ho hahalok krime nian imi nia moris sei laiha valor.

Liafuan hanesan informa mos husi juiza Maria Modesta bainhira halao julgamentu katak, arguidu sira neebe mak mai dame malu ona iha tribunal nia oin, atu labele mai tan fali. Sekuandu mai tan, tribunal sei hatodan tan krime ba arguidu refere. Tanba bainhira tribunal halo ona konsolidasaun, katak lezadu fo perdua no dada fali keisa. Nunee tribunal absolve tiha arguidu husi krime refere. Signifika katak ba oin arguidu labele halo tan krime hasoru lezadu ka ema seluk iha futuru, kuandu halo nafatin krime entaun tribunal sei hatodan tan krime ba nia no pena mos aumenta. Informasaun kompletu iha STL Jornal no STL Web, edisaun Kinta (2/6/2016). Domingas Gomes

Suara Timor Lorosae