Governu timoroan asina kontratu ba ponte foun iha Díli ho empreza japoneza

Governu timoroan asina sábadu iha Tókiu kontratu dólar  millaun 15 ba konstrusaun ho naran "terseira ponte" kona-ba mota  Komoro nian, iha zona orientál kapitál, Díli, informa ezekutivu ne’e.

Tuir nota ne’ebé simu hosi ajénsia Lusa, Ministériu Obras Públikas, Transportes no komunikasaun (MOPTC) esplika katak kontratu ne’e, finansia ho apoiu hosi Japan Internationál Cooperation Agency (JICA), ne’ebé servisu hamutuk ho  empreza Tobishima Corporation.

Konkursu  ba obra ne’e realiza tiha ona iha fulan kotuk no aprezenta  empreza haat.

Ne’e hanesan projetu empreza japoneza badahaat iha Timor-Leste, hafoin hadia Portu Oekusse, obra ba estrada entre Díli no Cassa no konstrusaun Farmásia Sentrál nasaun nian.

JICA finansia kuaze totalidade projetu sira ne’e, kabe deit  ba Timor-Leste pagamentu iha kompensasaun ba komunidade lokál ne’ebé afeta hosi  obra ne’e.

Ho komprimentu metru 249 no ligasaun iha parte rua ne’ebé hamutuk  liu  kilómetru 3,2, obra ne’e sei  hahú iha fulan hirak tuir mai no sei lori fulan  29  nia-laran atu konklui.

Nia  trasadu define ona iha finál tinan kotuk, liga ba iha kruzamentu edifísiu Timor Block to’o ba estrada nasionál A3.

Ponte, ne’ebé hakarak  reforsa   ligasaun  entre parte rua kapitál timoroan nian, ne’ebé bele reduz ona volume tránzitu iha ponte CPLP, únika entre parte rua mota ninian, no hadia sirkulasaun rodoviária entre leste no oeste sidade nian.

Ba segunda faze Ponte CPLP nian - iha Avenida Prezidente Nicolau Lobato – hetan  inaugurasaun iha loron 22 jullu 2014, iha momentu  Simeira Xefe Estadu no Governu Komunidade Nasaun Lia- Portugés (CPLP).

Ekipa ida hosi MOPTC loron hirak ikus ne’e iha ona  Tókiu atu rezolve  detallu ba akordu ne’e, ne’ebé sei  asina hosi  ministru Obras Públikas, Transportes no Komunikasaun, Gastão da Silva.

Ekipa ne’ebé iha ona  Tókiu inklui José Gaspar Piedade, diretór jerál Obras Públikas, Rui Hernâni, diretór Estradas, Isabel Lay, xefe Departamentu Análise Kualidade Projetu, no Milton Monteiro, xefe Departamentu Relasaun Esteriór.

SAPO TL ho Lusa