LFA JORNADA-10 MANAN AITANA 2-0, DIT SAI HUSI DEGRADASAUN

Primeira divizaun kampionatu Liga Futebol Amadora (LFA) Timor Leste jornada-10, ekipa DIT FC manan Aitana FC, 2-0 husi jogu kontra-atake ne’ebé mak hala’o iha Éstadiu Munisipal Dili, Sesta (24/06/2016).

Ho rezultadu jogu refere, ekipa DIT FC konsege sai husi zona degradasaun, tanba DIT FC rasik kolekta tan pontus hodi aumenta sira nia pontus ne’ebé mak antes ne’e iha 11 ba pontus 14 husi jogu 10 ne’ebé ekipa ne’e halo.

Hafoin jogu primeira parte foin hahu lal’o menutu 2 nia laran, ekipa DIT FC liu husi nia jogador iha posisaun avansadu, Henrique da Cruz marka golu ba dahuluk, wainhira nia aproveita bola passa ne’ebé mak oferese husi nia kompatriota Fransyatma Kefi.

Enkuantu golu refere, jogadores ekipa DIT FC nomos adeptus sira ne’ebé sempre asiste rasik ne’e festeza ho haklalak no kontenti.  Relasiona ho golu refere, treinador ekipa Aitana FC, Luis Simões halo kedas mudansas liu husi hatun nia jogadores estranjeiru nain tolu husi Indonesia, hanesan, Didyo Caesario, Adrian Rahmadani, nomos Joni Firmansyah, maibe lakonsege hetan rezultadu másimu ba ekipa. Tanba ne’e to’o jogu primeira parte remata, ekipa DIT FC lidera provizoriamente 1-0.

Hafoin deskansa tempu menutu 15, ekipa rua ne’e kontinua fali ba jogu segundu parte, Luis Simões kontinua halo mudansa ba jogadores ekipa Aitana FC, hodi hatama hikas nia guarda redi esensial Dedi Haryanto nomos meiu kampu senior Salvador da Silva. Estratejia ne’e lori Aitana FC la konsege iha mudansa hodi hetan oportunidade maibe avansadu Dibyo nomos Edit Savio la finaliza oportunidade refere ho másimu hodi marka netik golu responde.

Jogu kontra-atake hahu tama ba tempu menutu 59, ekipa DIT FC kontinua aumenta golu ida liu husi jogador estremu dereita (kuana-red), Gaudencio Monteiro, hafoin aproveita bola passa husi nia kompatriota Henrique. Hafoin unggul ho golu rua, ekipa DIT FC lidera husi kapitaun José Fonseca nomos Filipe Oliveira,  ne’e kontinua domina jogu iha kampu liu husi atake ne’ebé másimu no seríu. Tanba ne’e to’o jogu ne’e remata dutente tempu menutu 90, ekipa DIT FC manan Aitana FC ho score golu 2-0. Ito

Jornal Nacional