ATU HETAN MERENDA ESKOLAR, ESTUDANTES TENKI LORI BEE HUSI UMA

Estudante sira husi eskola Ensino Basiku Filial Batubesi, Postu Administrativu Maubesi, Munisipiu Ainaro, lor-loron obrigadu tenki lori bee husi sira nian uma rasik atu tein merenda eskolar, tanba bee iha Suku refere difisil.

Professor Paulo Mendonça informa katak, situasaun ne’ebe mak povu iha Suku refere infrenta mak, problema bee moos hodi difikulta mós prosesu apredizajen labarik sira nian iha eskola.

“Bainhira kuandu atividade merenda eskolar ne’e la’o, ami tenki fó servisu ba ami nia estudante sira, tanba ami bee laiha, estudante sira tenki lori bee lor-loron husi sira nia uma mak foin han merenda eskolar,” informa Paulo Mendonça ba Prezidenti Repúblika (PR), Taur Matan Ruak, liu husi dialogu komunitária iha Suku refere, Tersa (09/08).

Alénde ne’e, komunidade Julio de Almeida, mós lamenta katak, nasaun ne’e atu ba ne’ebe los, kuandu edukasaun sai problema hanesan ne’e.

“Ami lahatene futuru nasaun ne’e atu sai saida, tanba problema ne’ebé mak ami hasoru iha ne’e mak bee moos no sistema edukasaun la’o ladun di’ak,” relata nia.

Purtanto, komunidade Luis José Mendonca, mós dehan, povu  iha Suku refere susar liu ba bee moos, sira tenki la’o dok mak foin to’o bee matan.

“Tanba ne’e, ami husu ba Estadu atu dada netik ami nia bee mai besik ami, tanba SAS mai sukat ona ami nia bee ne’e, maibe to’o agora seida’uk iha rezultadu,” relata nia.

Alénde ne’e, juventudi Mafalda Mendonça mós husu atu aumenta klínika ida iha Postu Administrativu Maubise, tanba kuandu inan isin rua sira atu partus, susar tebes atu asesu ba sentru saude.

Hatan ba preokupasaun ne’e, Prezidenti Repúblika (PR), Taur Matan Ruak hateten katak, Edukasaun ne’e, sai problema bo’ot, la’os iha Maubise de’it, maibé iha fatin hot-hotu, tanba iha Suku balu profesores sira sulan estudante  100 ida sala ida de’it.

Taur Matan Ruak hatutan, meja no kadeira ne’e, Governu fahe hela, mais seida’uk hotu, tanba ne’e, nia husu ba inan aman sira iha Suku refere atu kuidadu sasan sira ne’ebé mak Estadu fó ona ba sira, hanesan kalteiras no mejas.

“Bee moos, ne’e husi Aileu no Turiskai, no Ainaro, imi iha problema bo’ot, tanba imi hela iha leten, bee iha okos,” katak Taur Matan Ruak.

Nia haktuir, bee moos ne’e, la’os preokupasaun iha Suku ne’e de’it, maibé iha kapital Dili de’it mós, sei halerik kona-ba bee moos.

Maibé Taur Matan Ruak dehan, Governu la’os taka matan ba problema sira hanesan ne’e, maibe presiza tempu, tanba ida ne’e problema ida ne’ebé povu iha Timor laran tomak preokupa.

“Ita nia Governu hanoin ona atu tinan oin fó prioridade ba buat sira ne’e, tanba ida ne’e liga direita ho ema nia moris,” katak Xefi Estadu ne’e.cos

Jornal Nacional