PR TAUR HAREE POVU RURAL SUSAR ASESU ATENDIMENTU SAUDE

MAUBISSE - Timor Leste ukun rasik nia a’an besik tinan rua nulu ona, no governu troka dala neen ona, maibé povu sira iha area rurál kontinua halerik ba atendimentu saúde.

Iha Suku Manetu ho Manelobas nu’udar suku ida ne’ebé do’ok liu hosi Postu Administrasaun Maubisse, Munisípiu Ainaro. Populasaun sira iha suku rua ne’e difisil tebes asesu ba atendimentu saúde.

Xefe Suku Manetu, Alfredo Martins hatete, populasaun iha suku ne’e bainhira moras urjente tenke lori to’o ospital Referal Maubisse.

“Aktividade saúde ne’ebé mak la’o iha suku laran mak fulan ida, dala ida no asesu ba saúde iha Maubisse, maibé iha loron bailet moras atu lori ba ospitál referál Maubisse defisíl tebes,” haktuir Xefe suku Manetu iha diálogu komunitáriu ho Prezidente Repúblika, Taur Matan Ruak, Tersa, (09/08).

Xefe Suku hatutan, atendimentu saúde ne’ebé dulan ida-dala ida ba Suku sira mos ladun efetivu. Iha tempu udan tau doutór sira la ba iha suku refere hodi fó tratamentu ba komunidade sira.

Xefe suku hatete, bainhira populasaun sira deripenti mak moras todan halo tratamentu labele tanba tenke hala’i ba hospitál referál Maubisse.

Aliende ne’e kondisaun estrada ba suku refere mós defikulta komunidade sira tanba estrada kondisaun át tebes.

Hatan ba preokupasaun ne’e, xefe estadu esplika katak, governu halo esforsu maka’as hodi halo klínika, monta doutor no parteira sira iha suku hotu iha timor laran tomak.

Tanba ne’e suku sira ne’ebé mak seidauk iha doutór no parteira ne’e sei monta maibé populasaun sira tenke pasiensia, tanba dadauk ne’e governu sei halo esforsu.

Xefe estadu afirma problema saúde nian, suku barak mak populasaun sira levanta maibé sei lori tempu hodi rezolve problema refere.(dgx)

Timor Post