Durante Tinan XIV liu ona Dezenvolvimentu iha Suco Tapo/Memo no Suco seluk seidauk iha rezultadu diak

KLEJOTAMO

Klibur Estudante no Joventude Tapo Memo-Oan

Peskiza ho Monitorizasaun

Posto Administrativo Maliana, Munisípiu Bobonaro

Telefone: +670 77291406, +670 77369706, +670 77269256, 77014085

Komunikadu Imprensa

Data: 24 Agostu 2016

Durante Tinan XIV liu ona Dezenvolvimentu iha Suco Tapo/Memo no Suco seluk seidauk iha rezultadu diak

Tinan sanulu resin hat (14) liu tiha ona Timor-Leste restaura ninian Independensia maibé dezenvolvimentu iha parte konstrusaun estrada, ponte,be’e mos, eletrisidade, postu saude, irigasaun Maliana 2 no seluk-seluk tan  iha suku sira sei limitadu tebes. Tuir KLEJOTAMO nian peskiza ho monitorizasaun durante ne’e katak dezenvolvimentu konstrusaun infra-estruktura la’o maka’as liu mak iha kapital Díli no kapital munisipiu sira seluk deit, maibé iha suku no area rural sira mos persiza tebes  hetan atensaun husi Governo hodi nune’e komunidade sira iha area rural mos senti netik ho Timor-Leste nian independensia ida ne’e.

Tamba ida ne’e, bazeia ba KLEJOTAMO nian peskiza iha suku Tapo/Memo durante ne’e hare’e katak, dezenvolvimentu iha suku refere seidauk hetan rezultadu ne’ebé diak, tamba estrada husi parte rua (2) ne’ebé liga husi Postu-Administrativu Maliana ba Suco Tapo/Memo iha kondisaun ne’ebé seidauk diak ou at hela. Ponte ida Nakarena aldeia Huluatin iha Suco Tapo/Memo ne’ebé maka halo iha tempu okupasaun Indonesia nian komesa at dadaun ona no seidauk hetan atensau ruma husi ministeriu kompetente. Wainhira tempu udan boot mota tun ponte refere komunidade sira atu hakat liu susar tebes. Ponte refere mos atu fasilita komunidade sira lori sira nia produtu lokal ba iha merkadu no fasilita mos estudante sira bele liu bainhira atu ba eskola. Iha parte seluk, Suco Tapo/Memo presiza tebes atu hari Centru Postu Saude ida iha ami nia suku hodi nune’e komunidade sira fasil atu halo tratamentu imediatamente ba sira nia saude.

Iha lidun seluk, tinan 2011 liuba eis Secretário Estado Eletrisidade atual Vice Ministro Obras Públika Transporte no Komunikasaun Eng. Januario Pereira haruka tiha ona ekipa ida ba survey liña eletrisidade. Hahu husi ospital tuan Maliana ba to’o aldeia Lepguen, Aldeia Pipgalac II iha Suco Tapo/Memo, Suco Saburai iha Postu Administrativu Maliana no ba to’o Atus Suco Zildapil, Postu Administrativu Lolotoe nian, Munisípiu Bobonaro, maibé ate agora projeito refere seidauk realiza. Tuir  KLEJOTAMO nia monitorizasaun hare katak iha desintendementu entre kompaña balu, maibé problema hirak ne’e komunidade sira sai vitima fali ba dezenvolvimentu projeito liña eletrisidade.

Iha sorin seluk, Masacre iha loron 27 Agostu 1999 liuba ne’ebé mak akontese iha Suku Tapo/Memo iha ne’ebé pro-otonomia sira hamutuk hoPOLRI-Polísi Republik Indonesia  no TNI-Tentara Nasional Indonesia hala’o kampanye tama iha suku refere atu bele atrai povu sira iha tempu ne’eba, maibé realidade to’o iha ne’eba sira halo fali asaun brutalizmu hodi tiru mate rezulta hamate ema nain 2 (rua) no hakanek ema nain 3 sira seluk. Tamba deit diferensia hanoin iha momentu ne’ebá suku refere sira tau hanesan liña mean (garis merah) ba pro-Independensia. Ho ida ne’e tinan 15 liu ona komunidade suku Tapo/Memo selebra nafatin kada tinan-tinan hodi hanoin hikas fali maluk ne’ebé mak mate iha tempu ne’eba nune’e istoria ne’e sei la lakon ba jerasaun foun sira iha Suco Tapo/Memo nian oan no em jeral iha Timor-Leste.

Ho ida ne’e KLEJOTAMO hakarak rekomenda ba ministériu relevante mak tuir mai ne’e:

Rekomenda ba MOPTK-Ministru Obras Públika Transporte no Komunikasaun Gastão Francisco Sousa atu hare lalais estrada no ponte ne’ebé besik at ona tamba importante ba povu sira iha suku hodi fa’an sira nia produtu iha merkadu.

Rekomenda ba MOPTK atu hari’i lalais ponte ida ba iha Eskola Sekundaria Nu. 02 Yamato Maliana nian ne’ebé mak dala barak estudantes no povu babain susar atu astravesa iha tempu udan mota boot tun iha fatin ne’eba.

Rekomenda ba Ministra da Saude Dra. Maria do Céu da Costa atu hari’i mos Centru Postu Saude ida iha suco Tapo/Memo, tamba dala barak iha kalan situasun emerjensia pasiente sira susar tebes halai mai to’o Hospital Referal Maliana tamba kondisaun dalan estrada la diak.

Rekomenda ba Vise Ministru Obras Públika Transporte no Komunikasaun Eng. Januário Pereira atu hare mos eletrisidade ba Suku no aldeia ne’ebe ami temi iha leten.

Rekomenda ba MSS-Ministra Solidariedade Social atu hare akontesementu ne’ebé mak akontese iha suku kada iha teritoriu Timor-Leste hotu, hodi nune’e halo monumentu ida ba ita nia heroi sira ne’e bele tau iha fatin ho sira nia dignidade ne’ebé as ba rai ida ne’e. 

Ekipa KLEJOTAMO

Moisés Vicente, Abrão Gomes, Klaudino Kolo, Roque Afonso, no Isabel Gomes