MNEK Sei Koopera ho Indonézia Atu Fasilita Resensiamentu

DILI, (ANTIL) – Governu liu-hosi Ministériu Negósiu Estranjeiru no Kooperasaun (MNEK), sei buka posibilidade atu koopera ho Indonézia hodi fasilita resensiamentu eleitorál 2017 ba sidadaun timor sira.

”Konsellu Ministru iha mós diskusaun kona-ba ida ne’e, forma ekipa traballu atu konkretiza pasu sira tuir mai, kalenderizasaun atu halo resensiamentu nomós preparasaun ba ita nia sidadaun hotu iha rai laran no  rai li’ur atu partisipa iha festa demokrásia”, Vise-MNEK , Roberto Soares ko’alia ida-ne’e hafoin semináriu ho péritu direitu internásionál Singapura ba jornalista sira iha MNEK, Kinta, (24/8).

Semana oin, tuir Vise Ministru, sei desloka ba Indonézia atu observa besik liu tan sidadaun Timor-oan sira ne’ebé estuda hela no trata mós asuntu seluk.

”Ita sei tenta atu esplora posibilidade iha kooperasaun ho Indonézia, para bele fasilita resensiamentu ne’e ho di’ak”, Roberto informa. Sei kondisaun permite,  Governu sei haree mós embaixada Timor-Leste iha nasaun seluk, ne’ebé sidadaun iha Timoroan barak, atu fó oportunidade hanesan bele partisipa eleisaun 2017.

Tanba ne’e, MNEK koordena ho Ministériu Administrasaun Estatál (MAE), Sekretariadu Tékniku de Administrasaun Eleitorál (STAE) nomós Komisaun Nasionál ba Eleisaun.

Iha fulan-Juñu no Jullu 2016, MAE ho STAE halo aprezentasaun komprensível ba embaixadór sira, kona-ba prosedimentu ne’ebé oras ne’e dadaun prepara, atu  bainhira to’o ona tempu hala’o resensiamentu, bele halo atendimentu hanesan ba ema hotu.

”Hosi MNEK rasik halo ona prosesu inisiál ida, orienta embaixada hothotu hodi komesa ona halo buat ida ne’ebé hanaran inskrisaun konsulár, atu identifika Timoroan hothotu iha li’ur, tantu estudante, serbisu nomós sira ne’ebé pasatempu liu loron tolu nolu”, nia hatete.

Nia hatutan, importante tebtebes atu hatene paradeiru Timoroan iha ne’ebé no saida mak sira halo, karik sira presiza buat ruma ka obstakúlu saida maka sira hasoru iha sira nia atividade sira iha li’ur.

“Embaixada buka meius atu bele fasilita, salvaguarda, haree sira nia seguransa nomós oinsá sira nia estádia iha ne’ebá (li’ur)”, vise ministru dehan tan. Husu kona-ba orsamentu  ba resensiamentu, Vise MNEK Roberto da Costa  esplika,  iha duni orsamentu resensiamentu ba embaixada, maibé jere hosi MAE  hanesan supervizor atividade resensiamentu.

”Kestaun orsamentu la’os impedimentu ne’ebé boot ba inisiativa ka prosesu sira hanesan ne’e. Fundamentál mak koordenasaun no komunikasaun entre ministériu relevante, para depois labele duplika atividade no kalendarizasaun ne’ebé estabelese ona”, nia hakotu.  (jornalista: Rafy Belo; editora: Rita Almeida)

Foto: Vise MNEK Roberto Soares. Foto ANTIL