KOMANDU MUDA OKNUM BAKU JORNALISTA HOSI UNIDADE TRANZITU

DILI - Komandante Polísia Nasional Timor Leste (PNTL), Komisáriu Júlio da Costa Hornay hatete, komandu muda tiha ona  oknum polísia hosi Unidade Trânzitu ne’ebé baku Jornalista Jeronimo Amaral iha semana kotuk.

Maske la temi unidade ne’ebé mak oknum ne’e muda ba, maibé Komisáriu Hornay dehan, oknum refere labele hala’o ona kna’ar iha unidade trânzitu hodi muda ona ba unidade seluk iha munisípiu  Dili, tanba halo kazu hasoru jornalista.

“Ami muda ona membru ne’e hosi trânzitu, mais nia prosesu kontinua la’o. Orsida maka determina nia sala simu konsikuensia, ema hotu iha lei nia okos,” afirma Komisáriu Hornay ba Jornalista sora  iha Kuartel Jerál  PNTL, Kaikoli, Segunda (01/8).

Kona-ba relatóriu falsu ne’ebé polísia sira iha Unidade Trânzitu hafoin baku jornalista haruka ba komandu jerál  katak la baku jornalista, inkuantu iha CCTV hatudu oknum polísia ne’e basa jornalista Jerónimo, Komisáriu Hornay hatete, prosesu investigasaun kontinua la’o hodi deskobre lia loos.

Eis Komandante Akademina Polísia ne’e subliña, membru polísia ne’ebé de’it maka sala ruma tenke simu prosesu rua, inklui kriminal ba tríbunal no prosesu disiplinar nian hosi komandu PNTL rasik.

Pena Másimu Tinan Tolu

Entretantu Ministériu Públiku liuhosi Prokuradoria Distrital Dili hahú ona prosesu investigasaun ba kazu baku Jornalista ne’ebé rejista ona ho númeru rejistu 1665/07/2016.

Prokuradoria Jerál da Repúblika (PJR), José da Costa Ximenes informa, kazu ne’e kategoria kazu ofensas kosporantes simples, tanba ne’e nia sentensa mak másimu tinan tolu (3) no mínimu mak kadeia loron 30.

“Ne’e ofensas korporantes simples, lejitimidade mak ita boot nia kolega jornalista sira. Espera fulan ida, fulan rua tan prosesu ne’e hotu,” PJR José ba jornalista sira iha Palásiu Prezidensiál, Bairo-Pite, Dili, Segunda (01/08) hafoin enkontru ho Prezidente Repúblika (PR), Taur Matan Ruak.

Antes ne’e, jornalista Jeronimo akompaña hosi Diretór Business Timor, Carlos Malilaka hamutuk ho Timor-Letse Press Uniaon (TLPU) no Asosiasaun Jornalista Timor-Leste (AJTL) hato’o ona keixa ba Komandu PNTL, Konsellu Imprensa no Ministériu Públiku (MP) hodi prosesa kazu ne’e hodi hetan lia loos.

Kazu ne’e akontese bainhira jornalista, Jernomio hasai foto polísia hosi unidade Trânzitu nian halo hela pasa revista ba kareta iha área Colmera, Dili nian maibé polísia basa jornalista refere maske jornalista rasik deklara-án ona katak jornalista ida iha mídia Bussnis Timor.(way/dgx)

Timor Post