Timor-Leste: Média Anuál Redusaun Moris-Kiak Nian Besik 2,4%

Díli, (ANTIL) - Vise-Ministru Finansas Helder Lopes, hateten tuir padraun internasionál nian sira, husi 47,2%, iha tinan 2007, índise moris-kiak iha Timor-Leste tun ba 30,3%, iha tinan 2014, ne’ebé signifika katak kumprimentu  husi Objetivu Dezenvolvimentu Miléniu nian sira. Iha tinan hitu ne’e nia laran, média anuál redusaun moris-kiak nian besik 2,4%.

Helder Lopes, aprezenta rezultadu husi estudu kona-ba moris-kiak iha Timor-Leste, iha sorumutu Konsellu Ministru, 26/07/2016 iha Palásiu Governu, Díli.

Estudu ne’e hala’ona iha tinan 2014. Dadus hirak ne’ebé rekolla ona hatudu ba redusaun ida ne’ebé maka’as husi índise moris-kiak iha nasaun ida ne’e hosi kedas tinan 2007 nian, tinan iha ne’ebé maka hala’o ona estudu anteriór.

ANTIL – Agência Noticiosa de Timor-Leste