CNE IDENTIFIKA ELEISAUN SUKU ELEITOR IDA VOTA DALA RUA

Prezidente Comissão Nacional de Eleições (CNE), Alcino Barris hateten katak, eleisaun suku ne’ebe maka hala’o iha loron 29 fulan Outobru 2016 CNE identifika akontese eleitor ida vota dala rua.

“Ami identifika katak durante prosesu eleisaun ne’e barak maka vota liu husi dala ida, tanba prosesu eleisaun ne’e la garante seguransa ne’ebé maxímu, buat sira ne’e hotu akontese tanba iha lei ne’e fó atribuisaun kompetensia barak liu ba lideres komunitaria maka hahú sira nia inisiativa lori halo asembleia, forma meja, hili ema ba tuur iha meja, halo atendimentu no lei númeru 9/2016 ne’e fó kompetensia ligadu liu ba autoridade munisípiu ou seja MAE, tanba lei ne’e elimita katak STAE no CNE apenas fó deit kontribuisaun asistensia teknika,”prezidente CNE, Alcino Barris, informa ba Jornalista sira iha salaun enkontru CNE, Colmera-Díli, foin lalais nee.

Akontese ema ida vota dala rua, tanba ema ne’ebé maka tuur iha meja ne’e la hetan formasaun sufisiente, nune’e sira nia atendimentu la maxímu, sira foti desizaun la monu tuir eleitores no kandidatu sira nia hakarak, no tanba tempu limitadu sira la konsege hetan lista kandidatura no labele tau marka tinta ba eleitores ninia liman lori halo distinsaun ba ema ne’ebé maka vota tiha ona.

“Situasaun hanesan TL ne’e ita hotu-hotu hatene, kuandu ita organiza eleisaun ida maka la’o ho kapas no diak, ninia rejultadu oinsa deit ema simu, kontantu tenki fear, ha’u hanoin eleisaun kuandu la fair iha manobras balun bele halo re-eleisaun fali, ita bo’ot sira haree neste momentu iha 292 suku maka tenki halo re-eleisaun fali ba segunda volta, to’o ohin dia 1 Novembru problema eleisaun nivel aldeia ne’e sei iha hela, tanba problema 50% mais 1 ne’e,”esplika Alcino Barris.

Nia dehan, eleisaun suku hetan ánimu no partisipasaun as husi populasaun, hatudu populasaun ne’ebé maka iha munisípiu tenki halo viajen ba suku ne’ebé maka sira rezistradu ba hodi hili sira nia lideransa.

“Maibé prosesu eleisaun ne’e ladun monu ba ema barak nia laran, tanba eleisaun ne’e rasik ita bele dehan komplexu no komplikadu, tanba lei ne’ebé hahú husi inisiativa husi MAE ne’e katak meja tenki halo atendimentu ba kandidatura ne’e hafoin iha loron 29 Outubru, nune’e kandidatura sira aprejenta an hahú husi dader tuku 7 to’o tuku 9, entaun tempu ne’e kultu teb-tebes tanba hahú husi ne’e maka foin hakerek kandidatu sira ne’ebé hakarak kandidata an, nune’e  muito dependente eleitores kada aldeia ninian,”haklean prezidente CNE.

Alcino Barris sublinha, kuandu iha aldeia ida la manan ho 50% mais 1, iha loron ne’e kedas tenki halo eleisaun segunda volta, iha aldeia balun eleisaun segunda volta mós rejultadu la atinji 50% mais 1, nune’e sira tenki halo konsensus delega deit kandidatu ida maka sai sira nia Xefi, nune’e halo ema barak konfuzaun no dezanima.

“Sorti ami esforsu maka’as disemina prosesu eleisaun kuaze ba teritoriu laran tomak hodi ema barak komprende netik, maski komprende ida ne’e la habelar fali tun to’o kraik, tanba parte ne’ebé maka atu habelar maka autoridade munisipal sira maka bele habelar, tanba lei ne’e ninia natureza ligadu liu ba MAE,” tenik Prezidente CNE. Ves

Jornal Nacional