DILI,
(ANTIL) - Ministru Komérsiu Indústria no Ambiente, Constâncio Pinto
hateten, Masakre Santa Cruz 12 Novembru 1991, tinan 25 liuba, sai momentu
istóriku ne’ebé loke odamatan ba mundu kona-ba luta ba independénsia, tanba
mosu violasaun direitu umanu iha Timor-Leste, husi militar Indonezia.
Lider
no autór 12 Novembru 1991 ne’e, hateten, importante tebes ba Timor-Leste atu
selebra nafatin masakre Santa Cruz tinan-tinan, hanesan memoria ida.
Nune’e, bele tranzmite ba joven sira atu banati tuir timoroan sira ne’ebé
fó an ba mate iha tempu ne’ebá.
“Iha
ikus ne’e, jerasaun sira banati tuir sira-nia ain fatin, haree sira-nia
espíritu patriotizmu ne’ebé boot hodi fó an ba mate tanba Timor-Leste.
Ida-ne’e, fó dedikasaun tomak ba dezenvolvimentu iha ita-nia nasaun
“Constâncio hateten ida-ne’e foin lalais ba ANTIL iha Palasiu
Governu, Dili, foin dadaun.
Maske
masakre Santa Cruz Dili liutiha ona tinan 25, Constancio sente hanesan
foin mak akontese no moris nafatin iha ema ida-idak nia hanoin , liuliu ba
jerasaun sira ne’ebé akompaña situasaun iha tinan 1991.
Iha
tinan 1991, juventude derrota iha forsa Indonézia nia liman. Maibé liuhusi
protesta ne’e, timoroan hatudu ba mundu seluk, rekoñesidu apoiante Indonézia,
katak Timor-Leste hakarak liberta-an no sai nasaun foun, independente husi
Indonézia.
No
akontesimentu 12 Novembru 1991, Timor-Leste moris iha momentu trájiku iha nia
istória. Depois eventu masakre St. Crúz, kuaze nasaun hotu fó apoiu ba
Timor-Leste no rekoñese populasaun nia direitu, atu determina Timor-Leste tenke
ka la independente, liuhusi konkretizasaun referendu iha 30 Agostu 1999.
(Jornalista : Maria Auxiliadora/Editór: Otelio Ote)
Sem comentários:
Enviar um comentário