MANDATU KALBUADY REMATA ONA, KLUBU EJIJI FFTL REALIZA KONGRESU

Klubu Futebol sira ne’ebé ezisti iha Timor-Leste (TL), husu ba Federasaun Futebol Timor-Leste (FFTL) atu iha tempu badak tenki realiza kongresu hodi hili fali Prezidenti foun, tanba mandatu aktual Prezidenti Francisco Kalbuady Lay remata ona.

Vise Prezidente klubu Carsae FC, José Carvalho husu ba FFTL atu realiza lalais kongresu hodi hili fila fali prezidente foun. Tanba ne’e hanesan presedente ne’ebé ladiak iha públiku.

“Ida ne’e tristeza boot ida husi klubu. Ami sente katak ami triste tanba tuir regulamentu ne’ebé mak iha no ita hatene katak to’o tinan lima tenke iha kongresu, minimu tenke ser tinan rua ida halo kongresu extraordinariu para bele hatene lolos,”hatete José Carvalho iha Gabinete Sekretaria Estadu ba Juventude no Desportu (SEJD), eis-sional Lecidere Dili, Sesta (02/12/2016).

Vise Prezidente Carsae FC ne’e afirma katak, realidade kongresu ne’ebé mak tuir loloos hala’o iha fulan hirak liu ba ne’e nafatin la la’o, tanba ne’e mak hanesan kestaun boot ida ba públiku.

“Ita espera katak tempu to’o ona para tau buat ne’e iha nia fatin lolos. Ida ne’e ha’u koalia hanesan husi parte klubu nian, la’os Amante. Se karik Amante entaun ne’e ha’u halo kritika maka’ás, maibe tenke ser tau ona interese klubus, jogadores a’as liu buat hotu-hotu. Ne’e eziste tanba iha klubus nomos iha jogadores,”afirma Nia.

Haree ba tinan ida ne’e no tinan kotuk Timor-oan barak ne’ebé mak hadomi futebol, liu-liu Prezidente Klubu sira hamutuk 21 klubus ho sira nia sponsor investe osan la’os oituan. Tanba ne’e mak federasuan tenke nakloke-án.

“Ita espera, kongresu ida agora tenke ser realiza nune’e bele tau inrterses klubu, jogadores ho ema sira ne’ebé hadomi bola a’as liu hotu-hotu, labele dehan ema ida-rua ka grupu ida nia interese a’as liu buat hotu hotu,”tenik Nia.

José Carvalho tenik tan katak, to’o agora tuir informasaun ne’ebé mak espalha, klubu sira ne’ebé iha Liga Futebol Amadora (LFA) ne’e seidauk rejista iha AFC, tanba ida ne’e sei fo impkatu ba klubus.

“Ema sira hadomi bola ne’e liu-liu hanesan Prezidente sira investe laos oituan no ha’u koalia Carsae FC ne’e tinan ida, ami gasta $150 ital mill ba aktividade hotu-hotu hosi ami nia gastus ba halo negosiasaun, ami nia gastus loron-loron to’o halo kontratu ba jogador sira, no ida ne’e ami rugi, se karik ami gastus boot hanesan ne’e ami la rejista iha AFC,”José Carvalho preokupa.

Nia dehan, kongresu ne’e tuir lolos klubu sira mak halo hodi hili sira nia lideransa atu jere federasaun.

“Klubu tenke hili sira-nia asosiasaun, asosiasaun hili asosiasaun distritus, despois asosiasaun distritus mak iha direitu ba halo kngresu atu hili se mak sai lideransa ba Prezidente Federasaun, la’os hosi leten mak halo fali servisu tun-mai mak hili fali Prezidente, ida ne’e kontrariu fali. Hanesan ai karik moris mai la’os hosi hun, maibe dikin mak tun fali mai no hun mosu ikus, ne’e sala boot,”dehan José Carvalho.

Husi sorin seluk, fontes importante iha FFTL ne’ebe lakohi publika nia naran esklarese katak, prosesu hotu kona-ba distinu estrutura FFTL nian konsagra nanis iha estatutu FFTL.

Atu realiza kongresu FFTL, tuir fontes ne’e katak, Prezidenti FFTL maka iha kompetensia boot no hirak ne’ebe bele ejiji halo kongresu maka asosiasaun futebula distritu 13. Katak, klubu sira ho ema sira la’os ejekutivu FFTL nian bele iha komentariu no apresiasaun ba servisu FFTL nian, mas klubu la iha direitu absoluta atu ejiji kongresu ba FFTL.ito

Jornal Nacional