PN sei Halo Leilaun, Kada Prado Rihun $10

DILI: Parlamentu Nasionál propoin orsamentu hamutuk millaun $3 iha Orsamentu Jeral Estadu (OJE) 2017 hodi sosa karreta foun ba deputadu sira. Entretantu, ba karreta ne'ebé daudauk ne'e deputadu sira uza, sei leilaun.

Iha tinan hirak kotuk ba, PN sosa karreta ho marka prado ba deputadu sira. Kada karreta ho folin $60.000.

Lee mós: 2017, PN Sosa tan Karreta & Laptop Foun

Ba deputadu foun ne'ebé sei tama iha PN iha tinan oin, sei la uza karreta tuan, tanba karreta prado hirak ne'e sei lelaun ho folin $10.000 kada karreta.

“Karreta foun ne’ebé atu sosa, ninia kustu ki’ik husi folin Prado. Purvolta $40 mill”, informa Vise Prezidente Komisaun C, Izilda M. Soares ba olatimornews.com iha Parlamentu Nasionál, Segunda (05/12).

Kona-ba modelu karreta no kuantidade, deputada ne'e la informa klaru. Nia dehan de'it katak, orsamentu ne’ebé preve atu sosa karreta ne’e hamutuk millaun $3.

Nia hatete, PN tenke sosa duni karreta foun, tanba tuir planu, karreta Prado ne’ebé deputadu sira uza sei tama iha prosesu leilaun.

“Leilaun ne’e depende ba deputadu sira. See mak hakarak bele foti. Se la’e PN loke konkursu lelalun ba públiku. Kada karreta ninia kustu leilaun $10 mill”, dehan Izilda.

Razaun leilaun, nia dehan tanba manutensaun ba karreta Prado ne’e karun demais, no ninia pesa sira defisil atu hetan.

“Dala-barak tenke hameno husi (rai) li’ur,” katak nia.

Iha fatin hanesan, Deputadu Bankada Fretilin, Francisco Branco hatete, mosu pro no kontra ba desizaun atu sosa karreta, maibé barak liu mak hatete tenke sosa karreta.

“Tinan oin sei sosa duni karreta,” deklara Branco. (*)

Tomé Amado – Ola Timor - Editor: Tellukoro

Foto: Reprezentante Povu iha Parlamentu Nasional deside hodi propoin orsamentu millaun $3 ba sosa karreta foun ba deputadu foun sira. (olatimornews FOTO: Aquino Campos)