Primeira Dama Husu Xanana Labele Halo Tuir Nia Hakarak Hanesan iha Tempu Rezisténsia

Primeira Dama, Isabel Ferreira kestiona karta aberta ne´ebé Ministru Planeamentu no Estratéjiku, Kay Rala Xanana Gusmão haruka  ba Tribunál hodi minimiza sistema judisiál relasiona desizaun Tribunál hamonu sentensa ba Eis Ministra Finansas, Emília Pires.

“Karta ne´e minimiza ita nia sistema judisiál. Hanesan sidadaun no hanesan ativista direitus umanus, ha´u la konkorda,” Isabel dehan ba jornalista sira iha Palásiu Governu, Segunda (30/1/17), relasiona ho karta aberta ne´ebé iha semana kotuk Xanana haruka ba Tribunál katak nia (Xanana) la konkorda desizaun ne´ebé Tribunál hasai ba Emília Pires.

Nia realsa sé Xanana la konkorda ho desizaun ne´ebé Tribunál hola ba Emília Pires, hatudu provas. La´ós halo karta aberta hodi minimiza juiz, prokuradór no defensór sira. Ne´e la di´ak.

“Ita ohin hanesan nasaun independenti, satán nasaun ida ne´e hanaran Repúblika Demokrátika Timnor-Leste, tan ne´e, ita hotu iha lei nia okos. Ita hotu hakruk ba lei. Lei la haree nia prezidenti ou funu na´in. Lei trata hotu-hotu hanesan,” nia dehan.

“Ha´u formandu kursu direitu iha tempu Indonézia. Sé dehan sira ne´ebé formandu direitu iha tempu Indonézia ne´e mesak beikten de´it, ne´e Maun hatudu liman sala. Tanba durante tinan 15 nia laran, Maun serbisu ho ema sira beik no lahatene portugés sira ne´e. Nusa maka tanba de´it kazu Emília nian ami hotu beik maibé kazu barak ne´ebé akontese iha pasadu Maun la dehan ema beik? Liu-liu iha tinan 2006 ne´ebé Tribunál akuza ema hanesan Taur Matan Ruak, Marí Alkatiri, Lere Anan Timur, Falur Rate Laek no Maubuti, Maun la dehan Tribunál beik no la defende sira hanesan oras ne´e Maun defende Emília. Nusa maka Emília sai fali espesiál? Ne´e sai pontu interogasaun ba ita hotu,” Primneira Dama informa.

Nia husu ba Xanana hanesan eis líder másimu rezisténsia, tenkiser hatene katak ohin ita ukun án ona, la´ós ita iha rezisténsia ne´ebé buat hotu tuir Xanana nia hakarak de´it.

Iha tinan kotuk, Tribunál hamonu pena prizaun tinan sanulu ba Emília Pires no tinan haat ba Eis Vise Ministra Saúde, Madalena Hanjam, relasiona ho desizaun ida fó projetu sosa kama ba ospitál nasionál ba Emília Pires nia laen kaben. Kazu ida ne´e, prejudika Emília tenki halai sees hosi justisa no oras ne´e paradeiru iha Portugal. (Anibal)

Matadalan