Matadalan,
editorial
Iha
Fevereiru nia laran, Partidu Demokrátiku (PD) sei halo nia kongresu ba datoluk.
Ema barak liu-liu militante PD hein rezultadu kongresu ne´e bele fó satisfasaun
ba militante sira. Satisfasaun signifika líder PD ne´ebé hetan konfiansa tenki
iha lejitimidade forte, onestidade no akumulativu.
Será
PD sei mantein kadeira ualu iha Parlamentu Nasionál? PD bele mantein ninia
kadeira no bele mós aumenta bainhira sira iha laran serbisu maka´as no sólidu.
Bele mós menus tanba estrutura prinsipál PD iha tendénsia hadau malu pozisaun.
Ida ne´e sei harahun sira.
La´ós
ne´e de´it. Kazu remodelasaun iha tinan kotuk ne´ebé rezulta ministru no
sekretáriu estadu balun hosi PD remodela hosi Kintu Governu Konstitusionál fó
implikasaun maka´as ba PD. Tanba, persepsaun militante no simpatizante sira iha
baze katak membru PD eliminadu hosi governu purke laiha kapasidade halo
serbisu, deskonfia komete korupsaun no selu-seluk tan.
PD
iha figura barak maibé kongresista sira maka tenki matan moris no neon na´in
atu fihir figura ne´ebé iha kredibilidade atu lidera PD hodi infrenta eleisaun
jerál ne´ebé besik ona. Iha mundu polítika ne´e, ema barak haree liu ba iha
figura. Figura fatór determinante ba organizasaun ida nia futuru.
Uluk,
Saudozu La-Sama sei moris, La-Sama maka hanesan figura sentrál PD. Hafoin
La-Sama fila hikas ba mundu seluk, PD hela ho krizi lideransa. Bele mosu
La-Sama seluk iha PD maibé la´ós fásil. Lori tempu naruk no depende ba
situasaun. Agora, traballu de kaza ba kogresista sira atu fihir ho serteja
figura sira iha PD laran. Hili figura la´ós hanesan kedas La-Sama maibé
pelumenus nia karater besik La-Sama. Sé? Mariano Sabino Assanami, António da
Conceição, Adriano do Nascimento, Gastão de Sousa no Samuel Mendonça? Hili ho
konsiénsia ba! Fihir sala, PD hela naran (HELENA). (*)
Sem comentários:
Enviar um comentário