SEPFOPE GRADUA TAN FORMANDU 360

Sekeretaria Estadu Polítika Formasaun Profesional no Emprego (SEPFOPE), Kuarta (25/1/2017), ofisialmente gradua  tan formandu  Sentru Nasional Formasaun Profesional  (SNFP) no SenaiNT  STUDENTS hamutuk 360.

Iha seremonia graduasaun formandu CNFP SenaiNT  STUDENTS ne’e, SEPFOPE, Elidio da Costa Ximenes, iha nia diskursu hateten, SEPFOPE servisu hamutuk ho  sentru formasaun sira iha teritoriu Timor laran tomak halo ona diferensia barak  ne’ebé halo ema barak hakfodak  em termoos lingua no seluk tan.

“Ita bele konsidera hanesan diferensia mak asina kontratu ho Governu  Nothern Teritory ne’ebé mak  ajuda ita iha area lingua Ingles nian, ne’ebé depende ba numeru balun servisu ona no balun fali seidauk servisu  ne’ebé sai nu’udar parte ida ne’ebé mak ita tenki tau iha dferensia. Maibe iha buat balun ne’ebé mak ita seidauk halo, ida ne’e buat ida ne’ebé mak ita tenki rekoñese. Rekoñese katak  buat ne’ebé mak iha ona kontratu  ita prepara ema atu ba servisu  ne’ebé agora foin mak prepara deit ba ema ne’ebé mak mai tuir seidauk ba hanorin,”Ilidio da Costa Ximenes ba jornalista sira iha Salaun enkontru Madre Canossa Becora Dili.

Ilidio haktuir, meius hotu Governu sempre halo hodi minimiza preokupasaun entidades hotu liu-liu sosiedade sivil, inan aman no juventude sira kona ba numeru dezempregu ne’ebé kada tinan sempre aumenta hodi harii sentru formasaun iha area hotu-hotu.

Nia dehann, Governu kria formasaun oi-oin atu estudante finalista eskola Ensinu Sekudariu Jeral sira ne’ebé laiha kapasidade ekonomia atu kontinua estudu bele  tuir nune’e  bele hadia sira-nia moris liu husi formasaun ne’ebé mak sira hetan. Ne’ebé realidade hatudu katak   husi formasaun ne’ebé mak sira hetan, durante ne’e  tantu parte Governu inklui  emprezariu barak mak utiliza ona  formandu sira iha area oi-oin hanesan hotelaria, soldadura, elektrisidade  kanalizasaun  no seluk tan.

“Agora dadauk ita koalia saida mak formandu sira halo? Primeiru kuandu sira tama fofoun  maun Xanana dehan mai ha’u, Elidio o koko tok sentru formasaun sira ne’e bele halo buat ruma ka lae? Sentru formasaun Becora  uma lima ne’ebé mak ita halo iha Daulorak Manatuto uma rua estudante sira mak halo hahú husi fundasaun to’o remata entrega ba inan aman  kbiit laek inklui obra seluk tan hanesan halo Postu Polisia Trânzitu 8 iha kapital Dili inklui seluk tan  hanesan  kanalizasaun bee no  hadia  AC Hospital Nacional Guido Valadares (HNGV) ne’ebé moos halo husi formandu SNFP,”Ilidio  aprezenta.

Tuir Ilidio, aprezentasaun refere nu’udar rezultadu estabelesimentu sentru formasaun sira ne’ebé dala barak ema balun hanoin laiha folin, maibe realiadade  husi sentru  formasaun sira ne’e  formandu barak mak dadauk ne’e  servisu ona iha rai laran inklui moos rai liur  hanesan Australia nomoos Korea do Sul.

Liafuan hanesan moos hato’o husi Lourenco da Silva Gusmão, Diretor Sentru Nasional Formasaun  Profesional (SNFP), katak,  estabelesimentu  sentru formasaun la’os atu buka lukru, maibe atu forma ema sai ema tuir padraun. Tanba ne’e graduandu ne’ebé mak  hetan ona sertifikadu iha ona futuru ne’ebé naroman tebes iha oin, ne’ebé tenki orgulhu ho imi nia an ho imi nia kultura nomoos ho imi nia país.

“Imi mak Timor nia paisazen, istoria kultura no talentu ne’ebé moosu mai ho ideas foun, orgulho ho imi nia an imi nia kultura no imi nia paiz, karik iha imi nia familia laiha osan ne’ebé mak barak, ne’e laos kestaun. Ha’u-nia esperiensia  hanesan  ho ita nian moos, maibe ho edukasaun ne’ebé mak diak, ho koñesimentu no abilidade ne’ebé mak  foun  dedikasaun no servisu ne’ebé maka’as buat hotu  sei sai posivel,”Lourenco da Silva hatete.

Entretantu, Georgina da Silva, nu’udar jurídiku rekursus humanus EFAKA Group, hatete, nu’udar kompañia Timor oan prontu atu koopera ho Governu TL liu husi SEPFOPE  hodi hatama formandu sira ba iha kompañia refere iha area oi-oin  hanesan soldadura, kanalizasaun no seluk tan.

“Ohin (Ohin) SEPFOPE, Ilidio  koalia katak Fortuna Plaza  sei presiza formandu hamutuk atus tolu resin, ida ne’e ba FORTUNA Plaza deit ne’ebé sei hein to’o tinan tolu para depois remata mas agora dadauk  hanesan sira gradua ona ema tekniku sivil automatikamente ita halo fundasaun deit moos  ita presija ema para atu halo ida ne’e, nune’e ba  Sr. Fu Hau Kiu nia semente Timor ne’ebé iha Liquiça  Kaitehu moos agora dadauk hela deit Pelabuhan  ne’ebé konserteja presija ema liu-liu sira ne’ebé mak iha koñesimentu kona ba area IT, tanba ne’e  posibilidade bo’ot atu ami bele fo servisu ba formandu sira ne’e, maibe kestaun mak ne’e formandu sira ne’e bele responsavel ba sira nia sertifikadu ne’ebé mak sira hetan ne’e ka lae? Tanba iha kualker servisu saida deit importante mak responsavel no honestidade ida ne’e mak xave ba formandu sira atu hetan servisu,”hatete Georgina da Silva.

Graduandu hirak ne’ebé hetan graduasaun ne’e mai husi formasaun Panifikasaun baziku  hamutuk nain  45, informatika baziku 45, Hardware IT baziku 21, motos baziku 10, kustura  baziku 23, tizolu baziku 14, refigerasaun baziku 23, sertifikadu iha koalia no hakerek  lian Ingles 17, sertifikadu iha abilidade  fundasaun ba area profisional  27, sertifikadu II iha area elektrisidade 43, sertifikadu II iha soldadura 16,  sertifikadu II  iha padreiro 27, sertifikasaun iha kanalizasaun 15,  sertifikasaun III iha padreiru 12, sertifikasaun III iha kanalizasaun nain  10, sertifikasaun III iha elektrisidade nain 12.

Partisipa iha seremonia graduasaun formandu ho total 360 ne’e, SEPFOPE, Ilidio da Costa Ximenes, Primeiru Vise Ministra Edukasaun (VME), Dulce de Jesus Soares, Prezidente Komisaun F trata asuntu Saúde, Edukasaun, Desportu no Veteranus, Virgilio Hornai, Diretores, Xefi Departementu inklui Diretores Sentru formasaun hotu iha kapital Dili no seluk tan.Ola

Jornal Nacional Diário