ESTUDANTE UNTL GREVE, HARAHUN KARETA RUA

Estudantes Universidade Nasional Timor Lorosa’e (UNTL) husi fakuldade Engineria no Ciênçias Sociais e Politica, Kinta (16/3) hala’o asaun greve hasoru Reitoria UNTL, hodi harahun kareta rua (2), kadeira balu no estraga didin lolon gabineti reitor nian.

Estudantes sira hala’o asaun greve hasoru instituisaun UNTL, tanba laiha fasilidade kareta (Bus-Red) ba estudante fakuldade Engineria, inklui laiha projetor no laiha dosente atu hanorin estudante Ciênçias Sociais e Politica.

Kareta nebe rahu nee mak kareta UNTL nian ida, no harahun dosente fakuldade Agrikultor, Igidio Ximenes, ninia kareta ida.

Konaba asaun refere deputadu Parlamento Nacional, husi komisaun F ne’ebe trata ba asuntus saude, edukasaun, juventude no desportu, Eladio Faculto hatete, asaun greve harahun fasilidade sira ne’e konsidera krime, tanba ne’e presiza investigasaun.

“Iha kodigo sivil no penal mensiona, halo manifestasaun hodi estraga sasan públiku sei submete ba investigasaun, ”hatutan deputadu Eladio Faculto.

Tuir nia, lolos ne’e estudante sira halo manifestasaun tenke hatudu ezemplu diak iha publiku nia leet, maibe reitor UNTL mos persiza bolu estudante sira hodi buka solusaun ba problema ne’ebe mak estudante sira preokupa.

“Reitor Universidade Nacional Timor Lorosa’e, tur koalia ho manifestante sira hodi rona sira ninia ejizensia nune’e bele iha solusaun,”haklaken Eladio Faculto.

Iha sorin seluk deputadu bankada FRETILIN, e núdar mos dosente iha UNTL, Joaquim dos Santos haktuir, aktu husi estudante sira konsidera krime, tanba halo estragus patrimonio no fasilidade Estadu  tenke submete ba iha a.

Tuir observasaun jornalista iha terenu nota katak, asaun manifestasaun refere, hetan partisipasaun máximu husi estudantes hamanas tebes situasaun no mosu ambiente la hakmatek, e fó impaktu ba funsiunarius administrasaun no dosentes labele hala’o sira ninia knar.

 Iha parte seluk estudante sira deklara katak, asaun greve hasoru reitor UNTL ho nia estrutura, tanba kuaje tinan barak ona, maibe  edifisiu  FCS  laiha mudansa nomos besik semana ida estudante FE la halao atividade akademiku tanba kareta (Bus) ne’ebe durante ne’e tula sira at.

“Asaun ida ne’e ami halo atu ejiji ami nia direitu, asaun ida ne’e ami halo tanba kontinuasaun husi akordu  ne’ebe mak ami hala’o ho pro-reitor asuntu estudantil ho administrasaun  jeral iha UNTL iha dia 10 de Agusto 2016 ne’ebe mak  promete katak sedu ou tarde sei halo manutensaun iha semana rua nia laran maibe to’o agora ami estudante sira hein hela maibe nunka atu realija  liu-liu hadia  projektor ba iha parte sira ne’ebe mak importante hodi fasilita estudante sira maibe to’o agora laiha sinal positivu,”Rumau Piedade Mendonça, Portavos  Senado Pontu Vocal Faculdade Ciensia Cosiais (FCS) iha Kampus induk UNTL.

Nia dehan, asaun greve ne’e bazeia ba akta reuniaun ne’ebe mak Asosiasaun estudante sira hala’o iha loron 14 fulan Marsu  2017 hasai  ona katar  ultimatum  atu bele hetan rejultadu positivu husi reitor ho nia estrutura sira atu  toma responsavel ba iha problema  estudante nian, maibe laiha resposta nune’e asaun greve refere mosu.

“Tanba ami haree katak situasaun ne’e la kondis ona ho situasaun real, tanba ne’e asosiasaun estudantel sira ejiji atu ba hadia projektor, kantina, haris fatin, sala de aula no seluk tan ne’ebe mak sai preokupasaun ba estudante,”esklarese Portavos ne’e.

Alende ejiji ba reitor ho nia estrutura, estudante sira mos hatoo sira nia lamentasoens ba Ministerio Edukasaun,  tanba maske hatene katak  sala de aulas nomos fasilidade kampus UNTL la suficiente, maibe obriga UNTL simu estudante liu kapasidade ne’ebe mak iha.

“ME fo hela problema bo’ot ida ba UNTL, tanba rekruta ema kuatru mil sesentus pesoas (4.600) tama iha UNTL, maibe laharee infrasturtura universidade nian, estudante sira tama aula  fatin la to’o balun deit mak tur no balun hamrik mak tuir  aula, tanba fatin la permiti ne’ebe sai implikasaun ba ami estudante sira,”afirma Portavos ne’e.

Liafuan hanesan mos hato’o husi, Januario Pinto, nudar Senado Faculdade Filosofia katak, iha problema lubuk ida ne’ebe kuaze tinan barak ona estudante sira ejiji maibe nunka mais hetan resposta positivu tanba ne’e estudante sira foti inisiativu halao asaun greve hasoru reitor ho nia estrutura.

“Ida ne’e kontinuasaun ejijensia ou petisaun tinan kotuk nian, ne’ebe ami organija malu no konsege halo petisaun ida  ne’ebe parte estrutura universidade hotu-hotu asina katak liu deit  seman rua   sira sei rejolve ba problema sira hotu ne’ebe problema primeiru, kona ba problema projektor ne’ebe kuaje tinan  3 ona AC ho projektor hotu-hotu la funsiona,segundu  dadaun ne’e fakuldade enjenaria ne’ebe nia distansia dok husi Dili  ne’ebe  baibain iha transporte husi universidade nian mak fasilita maibe ikus mai kareta  ne’e at ne’ebe labele fasilita  inklui mos  preokupasaun kona ba sertifikadu orientasaun nian ne’ebe mak estudante hotu selu ona maibe kuaje tinan ida ladauk simu,”Senado FF, Januario F. Pinto.

Hatan ba ne’e, Reitor Universidade Nasional Timor Lorosae (UNTL), Francisco Miguel  Martins hatete, preokupasaun estudante nudar preokupasaun reitor nian, atu rezolve problema hirak ne’e tuir etapa.

“Problema hotu tenki rezolve etapa por etapa, preokupasaun estudante sira nian ne’e ha’u nia preokupasaun uluk kuandu  tomada depose ha’u hakarak universidade ne’e sai universidade ida ne’ebe nabilan,  maibe buat hotu sai imajinasaun deit tanba osan ne’ebe mak Governu aloka ba UNTL kikoan tebes nune’e impede ha’u nia imajinasaun,”hateten reitor UNTL.

Nia dehan, estudante hotu tenki hatene no komprende diak kona-ba instituisaun universidade privado nomos instituisaun universidade governu, tanba universidade privado sira nia osan hotu-hotu iha reitor nia liman rasik  nune’e kualker problema hotu fasil atu reitor rezolve, tanba kaer rasik osan, maibe UNTL buat hotu-hotu tenki liu husi ME.

Ba problema sira ne’e hotu reitor UNTL promete katak, sei buka dalan para buka solusaun hodi rezolve problema ne’ebe mak estudante sira infrenta ne’e.

“Depois de eleisaun dia 20 no dia 21 ita sei iha tempu toleransia husi estado atu idak-idak ba tuir eleisaun iha nia fatin moris, maibe depois tama fila fali imi sira ne’ebe Fakuldade Engineria imi sei hetan transporte hodi ba halao imi nia atividade  ciensia,”haktuir Reitor UNTL.ito/ola

Jornal Nacional