Partidu lima apela votu iha Francisco Guterres (Lu-Olo)

Reprezentante sira hosi partidu polítiku timoroan lima: CNRT, Fretilin, CASDT, UNDERTIM ho PEP, apela ona iha loron-kinta ne'e votu iha kandidatu prezidensial Francisco Guterres Lu-Olo, destaka nia "lealdade, preseveransa, rezisténsia ho konsensu" iha deklarasaun hamutuk ida.

Deklarasaun apoiu nian le ona iha loron-kinta ne'e durante ekontru ida ho imprensa ne'ebé halo iha Lu-Olo nia sede kampaña iha Díli no ne'ebé partisipa hosi reprezentante sira partidu ne'ebé nia prezidi, Fretilin, no mós hosi partidu sira seluk ne'ebé apoia nia kandidatura tuir dalan formal.

Aleinde José Reis, sekretáriu-jeral adjuntu Fretilin nian, enkontru ne'e partisipa mós hosi Vergílio Smith, visi-prezidente CNRT nian nian (partidu boot timoroan nian), Gil Alves, sekretáriu-jeral hosi CASDT, Francisco Rubilari, sekretáriu-jeral hosi UNDERTIM no Emanuel Gusmão, prezidente PEP nian.

Iha textu hamutuk, reprezentante partidáriu sira destaka Lu-Olo hanesan "estadista ida ne'ebé koñese di'ak Estadu" no konstituisaun no ne'ebé sei serbisu hodi garanti funsionamentu normal nasaun nian, no bele reprezenta ekilibriu, iha estranjeiru no iha Timor-Leste.

Sira konsidera mós katak Lu-Olo, bainhira eleitu, sei hatene kopera ho Governu Timor-Leste nian no ajuda nasaun hetan benefísiu máximu hosi partisipasaun iha Komunidade hosi Nasaun sira ho Lian Portugeza, promove "diálogu entre instituisaun sira Estadu nian" nune'e mós ho instituisaun sira no organizasaun privadu sira no sosiedade sivil.

"Lu-Olo bele garanti tranzisaun liderasaun nasaun nian, hanesan ema ida ne'ebé komprende di'ak nesesidade povu nian no líder ida ho valor família nian, sosial nian, kultural no relijozu", refere hosi deklarasaun ne'ebé le hosi Francisco Vasconcelos, Lu-Olo nia porta-vós.

Sira konsidera katak kandidatu prezidensial "luta ba inkluzaun sosial no ekonómiku hosi povu Timor-Leste nian", sei fó atensaun ba kestaun sira jéneru nian no labarik sira nian no sei luta "ba juventude nia partisipasaun iha aspetu sira dezenvolvimentu" nasaun nian.

"Ami fiar katak ho kualidade sira ne'e Lu-Olo sei sai nu'udar Prezidente Repúblika ida loloos no ne'ebé maka nasaun presiza", refere hosi textu ne'e.

"Ami apela ba militante sira, simpatizante sira hosi partidu sira no ba povu Timor-Leste nian atu hotu hamutuk vota iha Lu-Olo nu'udar Prezidente Repúblika", hatete.

Reprezentante sira hosi partidu sira ne'e hafoin ne'e halo intervensaun sira ba apelu votu nian.

Kampaña eleitoral ba eleisaun prezidensial sira loron-segunda nian hotu iha loron-sesta ne'e.

SAPO TL ho Lusa