KRIME LAOS ‘INTELLECTUAL WAY’…!!!

Jornal Nacional Diário, editorial

Estudante sira Universidade Nasional Timor Lorosa’e (UNTL) kinta feira nee halao asaun greve hasoru retoria UNTL tamba laiha fasilidade kareta (Bus-Red) ba estudante fakuldade Engineria, laiha projetor no laiha dosente atu hanorin estudante Ciênçias Sociais e Politica.

Asaun greve intelektualidade nee nakfilak ba krime tamba estudante sira nee estraga fasilidade universidade nian, kareta rua, kadeiras no estraga didin lolon gabineti retor nian no mos sala ba aulas la suficiente.

Agora duvida mak karik nee mak maneira ema intelktual nian atu resolve problema ida?, lae. Estudante universitariu sira la divia espresa sira nian  hanoin, hakarak no ejijensia laos dalan violensia ka krime.

Universidade la hanorin ema halo krime, universidade la hanorin ema atu halo violensia, universidade hanorin ema atu sai matenek, univeridade hanorin ema atu sai ema, universidade hanorin ema atu oinsa solusiona problema ho dalan pasifiku, laos saida mak akontese dadauk nee.

Universidade Nasional Timor Lorosa’e nudar universidade estatal nebe melhor iha Timor Leste, tan nee tenki asegura ninia rebutasaun, naran diak iha nivel nasional no internasional, laos atu estraga.

Laiha duvida Problema iha UNTL nee laiha, maske universidade nee Estadu mak jere maibe problema nee sempre iha, importante oinsa mak bele jere didiak problema to’o hetan solusaun.

 “ME fo hela problema bo’ot ida ba UNTL, tanba rekruta ema 4.600 tama iha UNTL, maibe laharee infrasturtura universidade nian, estudante sira tama aula  fatin la to’o balun deit mak tur no balun hamrik mak tuir  aula, tanba fatin la permiti ne’ebe sai implikasaun ba ami estudante sira,” Portavos manifestantes.

Los duni, problema falta sala aula nee atu dehan kulpa karik nee kulpa Ministeriu Edukasaun nian tamba Ministeriu Edukasaun simu estudantes foun liu kapasidade no nesesidade universidade nian.

Iha ano letivo 2017 – 2018 nee, UNTL ninia kapasidade atu akomoda estudante foun 2500 deit, maibe Ministeriu Edukasaun simu 4600, restu 2100 nee atu tau ba iha nebe? nee mak problema.

Tamba universidade seidauk kria kondisaun atu akomoda estudante foun nebe mai ho numero boot, bele perturba aktividade akademiku, sala aula ida bele akomoda estudante 60 to 100, nee laiha aproveitamentu ona tamba kontra rasio normal 25 – 30 kada aula estudantes.

Ne’ebe  ejijensia estudante sira nee pretenente maibe asaun estraga fasilidade universidade nian nee krime nebe hakarak ka lakohi tenki responsabilidade pesoal, autor krime.

Nunee mos Ministeriu Edukasaun kria tiha problema nee labele fase liman, tenki esforsu buka solusaun, tantu aumenta orsamentu universidade nian atu loke ta sala aula no dosente sira ka oinsa? Nee matenek nain sira nee mak hatene liu atu solusiona. *