Informasaun provizóriu ikus: Lu-Olo eleitu ho 57,08% hosi votu válidu sira

Iha loron-segunda ne'e, Francisco Guterres Lu-Olo eleitu ona nu'udar Prezidente Repúblika Timor-Leste nian, hetan 57,08% hosi votu válidu, halakon klasifikadu daruak, António da Conceição, ho 32,47%, haktuir hosi informasaun provizóriu ikus sira.

Bainhira konta ona 100% hosi sentru votasaun hamutuk 696, Lu-Olo hetan ona votu hamutuk 294.938 kontra votu 167.760 hosi António da Conceição, iha eleisaun ida ne'ebé partisipa hosi eleitor 528.813 ka 71,16% hosi total resenseadu, haktuir hosi Sekretariadu Tékniku Administrasaun Estatal (STAE).

Iha fatin datoluk, dook tebes hosi kandidatu na'in rua dahuluk, okupa hosi José Luis Guterres, ne'ebé hetan votu 13.513 (2,62%), halakon José Neves, ne'ebé hetan votu 11.662 ka 2,26% hosi votu válidu sira (ne'ebé ho total 516.727).

Iha fatin dalima maka okupa hosi Luís Tilman, ne'ebé hetan votu 11.124 ka 2,15% hosi total, tuir António Maher Lopes, ho votu 9.098 ka 1,76% hosi total.

Pozisaun rua ikus maka okupa hosi Ângela Freitas, ne'ebé hetan votu 4.353 ka 0,84%, no Amorim Vieira ne'ebé hetan votu 4.279 ka 0,83%.

Kandidatu na'in neen ne'ebé ladún hetan votu hetan total votu 54.029 ka 10,46% hosi total.

Lu-Olo manán ona iha munisípiu neen hosi munisípiu 12 (Aileu, Baucau, Bobonaro, Kovalima, Díli, Lautem, Manatuto, Manufahi ho Viqueque), António da Conceição manán iha munisípiu Ainaro, Ermera ho Liquiçá no iha Rejiaun Administrativu Espesial Oecusse-Ambeno (RAEOA).

Prezidente eleitu, ne'ebé simu pose iha loron 10 Maiu, hetan nia rezultadu di'ak iha Viqueque, iha ponta leste nasaun nian, konsege hetan 82,79% hosi votu sira no aat liu maka iha Liquiçá, ne'ebé hetan de'it 41,35%.

António da Conceição rejista ona persentajen boot apoiu nian iha Liquiçá (49,82%) no aat liu iha Viqueque (9.67%).

Lu-Olo manán ona iha sentru votasaun tolu iha estranjeiru, hetan 65,61% hosi votu sira iha Lisboa, 64% hosi votu sira iha Sydney no 47,88% iha Darwin.

Informasaun provizóriu sira, ne'ebé agora tenki hetan validasaun ofisial, hatudu katak Lu-Olo hetan liu 50% iha munisípiu hitu hosi munisípiu 12 nasaun nian no António da Conceição la konsege maioria absolutu iha rejiaun ida iha nasaun.

Taxa boot liu hosi partisipasaun rejista iha Aileu, súl Díli nian, ne'ebé vota ona 81,49% no ki'ik liu iha Manufahi, iha mós súl kapital nian, ne'ebé vota de'it 68,05% hosi eleitor inskritu sira.

SAPO TL ho Lusa - Foto@ António Dasiparu /EPA