Prezidente Timor-Leste hanoin "grandeza extraordináriu" hosi Lusitânia Expresso nia misaun

Prezidente timoroan, Taur Matan Ruak, hatudu ona iha loron-sesta ne'e "gratidaun no rekoñesimentu" ba partisipante sira iha misaun "Paz em Timor", iha ró Lusitânia Expresso nia laran, iha tinan 25 liubá, ne'ebé nia konsidera hanesan "asaun ida extraordináriu tebes no ho solidariedade maka'as".

"Iha asaun extraordináriu tebes no solidariedade maka'as, grupu ida joven sira ne'ebé mai hosi nasaun 20 resin, ho nia kordenasaun, halibur esforsu sira no fó fatin ba inisiativu ida ne'ebé husik marka sira iha movimentu solidariedade internasional ba povu Timor-Leste nia kauza", xefe Estadu timoroan hatete, iha mensajen ida ne'ebé haruka ba partisipante sira, ne'ebé iha loron-sábadu ne'e hasoru malu iha Lisboa, hanoin hikas tinan 25 misaun "Paz em Timor".

Iha loron 11 Marsu 1992, mariña indonéziu impede ‘ferry-boat’ Lusitânia Expresso hodi avansa ba diresaun Timor-Leste nian, ne'ebé partisipante sira iha misaun “Paz em Timor” hakarak to'o hodi tau ai-funan iha rate Santa Cruz, hodi fó homenajen ba vítima na'in 200 resin hosi masakre ne'ebé halo hosi forsa indonéziu sira iha fulan-Novembru 1991.

Iha ró laran, iha ema na'in atus resin, inklui antigu prezidente portugés Ramalho Eanes, estudante hosi nasaun hamutuk 23, no jornalista portugés hamutuk na'in 25 no estranjeiru na'in 34.

Hasoru bandu hodi to'o iha Timor, sira so'e koroa ai-funan sira ba iha tasi laran.

"Ema timoroan sira simu ai-funan sira ne'ebé to'o liuhosi tasi. Maibé simu iha sira nia fuan hahalok ne'ebé furak no senti ona nia efeitu sira", afirma hosi Taur Matan Ruak, liuhosi mensajen ne'ebé nia hakerek.

Prezidente Timor-Leste nian fó hanoin katak "iha ró fraku ne'e - Lusitânia Expresso - iha fuan sanulu resin ne'ebé, ho lian ida de'it, reklama justisa no afirma solidariedade ba kauza ida ne'ebé justu tebes".

"Ha'u hatudu ami nia gratidaun no ami nia rekoñesimentu ba hahalok, ba ezemplu no ba nobreza hosi sentimentu sira ne'ebé hanesan orijen ba viajen Lusitânia Expresso nian ba tasi sira Timor nian", nia destaka.

Tanba inisiativu ne'e, "dala ida tan, mundu koñese saida maka akontese iha Timor-Leste no, iha fatin balun iha mundu, mosu hikas konviksaun katak solidariedade hanesan sentimentu furak ida no hamosu asaun sira inovador".

Fulan balun antes misaun ne'e, iha Novembru 1991, fó sai ona imajen sira hosi "masakre ne'ebé halo hasoru joven sira", iha rate Santa Cruz, iha Díli, "tanba prezensa hosi jornalista sira ne'ebé iha aten-barani", hatete hosi Taur Matan Ruak.

Serimónia evokasaun tinan 25 hosi Lusitânia Expresso no hosi Fórum Estudante halo iha loron-sábadu loraik iha teatru Thalia, iha Lisboa, no nia objetivu hodi reflete kona-ba kauza boot sira iha sékulu XXI.

Iha sesaun partisipa joven sira ne'ebé dedika ba intervensaun síviku no sosial, liuliu responsável sira hosi Konsellu Nasional Juventude no hosi Plataforma Apoiu ba Refujiadu sira.

Iha mós debate ida ho jornalista sira kona-ba nia hanoin kona-ba kauza importante sira, sei iha mós intervensaun sira hosi embaixadora timoroan nian iha Lisboa, hosi atual sekretáriu Estadu Ensinu Superior portugés nian, Fernanda Rollo, ho hosi Nuno Ribeiro da Silva, iha tempu ne'ebá nu'udar sekretáriu Estadu ba Juventude portugés no apoiante ba inisiativu ne'e.

Sei hanoin mós intervensaun hosi atual prezidente hosi Konsellu Administrasaun Caixa Geral de Depósitos, Emílio Rui Vilar, no hosi jornalista Adelino Gomes.

SAPO TL ho Lusa