Carrascalão Sei Halot Iha Jardim dos Heróis Metinaru

DILI (TATOLI) - Prizidenti da Repúblika Timor-Leste Taur Matan Ruak diside mate isin saudozu Mário Viegas Carrascalão sei hakoi iha Jardim dos Heróis iha Metinaru nu’udar sinal rekuñesimento Estadu Timor-Leste ba matebian nia luta.

Mário Carrascalão Taur Matan Ruak konsidera hanesan luta-na’in boot liu ida ba kondisaun Timoroan sira-nian no husik hela liman-rohan folin-boot ida ba jerasaun foun sira

“Sua Exelénsia Prezidente Repúblika, Taur Matan Ruak, Sesta-feira ne’e ho laran-susar tebes simu notísia kona-ba Enj. Mário Carrascalão nia mate no hato’o ona sentidu kondolénsias ba família matebian,” Espresaun sentimento xefi do estadu Timor-Leste, Taur Matan Ruak iha komunikadu imprensa ne’ebé TATOLI asesu hosi Gabinete Prezidensia da Repúblika, foin lalais ne’e.

Antes husik mundu no espesial Timor-Leste Enj. Mário Carrascalão simu Colar da Ordem de Timor-Leste hosi Prezidenti da repúblika Taur Matan Ruak perante partisipasaun hosi ulun-boot Nasaun nian barabarak.

Durante moris iha Timor, Enj. Mário Carrascalão nia polítika edukativa sira, merese atu hetan agradese.

Sinal agradesimento estadu nian mak Prezidenti da Repúblika diside Enj. Mário Carrascalão nia mate-isin bá hakoi iha Jardim dos Heróis iha Metinaru.

To’o notisia ne’e tun seidauk iha data fiksu ba seremonia funeral matebian Enj. Mário Carrascalão.

(Ekipa kobertura)

Foto: Saudozu Mário Carrascalão mak hamrik iha liman los, lider nasional Kay Rala Xanana Gusmao. Foto ne'e iha momentu Mário Carrascalão mos hola parte iha seremonia enkotru Maubise.