Figura Mário Carrascalão Lori Timor ba Mundu

DILI, (TATOLI) – Figura Mário Viegas Carrascalão durante okupasaun Indonézia loke dalan ba mundu atu foti asaun ba problema Timor-Leste ba prosesu luta ukun rasik-án.

Deputadu Parlamentu Nasionál, Arão Noe hateten durante asume kargu hanesan governadór ba Provinsia Timor-Timur, saudozu fò apoiu maka’as ba luta independènsia Timor-Leste.

ʺIha 1989 halo mudansa ba situasaun polìtika hodi halo abertura para Timor bele sirkula livre tanba antes ne’e deslokasaun ba ne’ebè de’it tenke uza surat jalan, hafoin nia halo mudansa Timor nakloke no jornalista sira mós bele tama Timorʺ, dehan ba Tatoli ohin iha uma fukun.

Durante mandatu hanesan governadòr, fó mós bolsu estudu ba timoroan sira ne’ebè luta ba ukun rasik-àn. ʺIntelektuàl timoroan ne’ebè oras ne’e iha timor laran, barak maka hetan bolsu estudu husi Màrio Viegas Carascalãoʺ, hatutan.

Prosesu ukun rasik-àn, saudozu mós fò apoiu maka’as ba prosesu bo’a governasaun husi nasionál to’o munisìpiu.

ʺLider barak sei uza matenek ne’ebè nia rai hela kona-ba bo’a governasaun ne’ebè nia halo bainhira asume kargu hanesan Vise Primeiru Ministru asuntu administrasaun no bo’a governasaunʺ, realsa.

Deputadu ne’e hatutan ho nia mate, TL lakon figura ida ne’ebè iha kapasidade atu dezenvolve Nasaun.

ʺHa’u hato’o sentidu kondolènsia ba famìlia boot Màrio Viegas Carascalãoʺ, hato’o deputadu hosi bankada CNRT ne’e.

Jornalista: Agapito dos Santos | Editora: Rita Almeida

Foto: Mário Viegas Carrascalão