Ema Balun Aproveita Figura Xanana-Taur Hariku-An

DILI – Deskonfiansa ema balun oras nee aproveita hela figura Kay Rala Xanana Gusmao nomos Taur Matan Ruak hodi hetan poder, defende ninia-an nomos grupu, maibe laharee ba povu nia moris diak.

Tuir Observador Politika-UNTL, Camilio Ximenes Almeida katak, ukun-an tinan 15 nee, tuir lolos povu moris diak ona, maibe realidade povu barak kontinua moris iha situasaun kiak no mukit nia laran, ida nee hatudu katak hetan poder defende deit sira nia-an.

Ema balun aproveita deit figura sira neebe mak diak nee, para atu hadau benefisiu iha neeba,” dehan Camilio ba STL iha nia knar fatin Kampus Lama-UNTL, Caicoli-Dili, Tersa (06/06/2017).

Camilio haktuir, figura sira neebe mak diak hanesan Xanana Gusmao, ema barak mak tama iha neeba, defende ninia-an, ninia tasu, maibe lakoalia konaba oinsa atu halo dezenvolvimentu. Nia dehan, hanoin diak neebe mak Taur iha, atu halo ba nasaun ida nee, sira neebe mak tama iha PLP laran hanoin lahanesan ho Taur Matan Ruak nian.

Iha fatin ketak, Deputadu Bankada FRETILIN, Paulo Moniz Maia dehan, ema balun aproveita deit figura hodi hariku-an nee iha tanba kestaun mentalidade, maibe hanesan Timor oan lapresiza sadere ba figura neebe mak iha kompetente. Raimundo Sarmento Fraga

Suara Timor Lorosae