Lahetan 33 Kadeira, CNRT Sai Opozisaun

DILI - Partidu CNRT neebe lidera husi Kay Rala Xanana Gusmão sei sai opozisaun kuandu iha Elisaun Parlamentar (Elpar) la hetan 33 kadeira.

Bainhira partidu CNRT la manan too kadeira 33, sei sai opozisaun hodi fo ba partidu seluk mak ukun,” dehan Deputadu Arao Noe husi bankada CNRT  ba jornalista iha Parlamentu Nasional, Kuarta (14/6/2017).

Nia hatete, eleisaun nee nia rezultadu kabe ba povu sira, karik povu fo nafatin konfiansa ba CNRT  entaun sira nia prinsipiu mak dezenvolvimentu atu lao tenke estabilidade, tanba nee mak presiza votus sufisiente CNRT  nia hakarak,  maibe latoo 33  kadeira CNRT sei sai opozisaun.

Komprimisiu ami nia sekarik CNRT lamanan iha eleisaun 2017  sai opozisaun,  husik partidu sira seluk ukun  ami prepara aan ba eleisaun tuir mai,” katak Arao.

Nia hatete, komprimisiu  CNRT nian mak iha eleisaun  parlamentar nee mak CNRT laliu 33 kadeira CNRT hili ba opozisaun, tanba tinan 10 nia laran lobi malu too ona,  lobi para atu iha konsesu atu dezenvolvimentu nee lao, mais iha lobi  ho negosiasaun sira neebe mak durante nee lao  ladun espesial  ba politika CNRT nian.

Tuir nia katak, karik CNRT manan ukun, sei konvida ema balu bele ba kaer ukun,  se partidu deside, mais ho misaun ida deit, halao programa CNRT nian, laiha tan negosiasaun atu negosiu ba malu katak  halo ida nee, halo ida neeba  diak kalae no hakarak kalae nee laiha, tanba sira nia planu kompletu tiha ona.

Entre tanti deputadu CNRT Cesar Valente hatete, cnrt partidu politiku neebe nia stratejia politiku atu lori programa ba dezenvolvimentu iha nasaun ida nee.

Neebe rezultadu ba elepar nian nee desizaun iha povu nia lima, ba sira CNRT lakohi gaba-aan katak, sei manan maioria, maibe povu mak sei deside katak partidu ida neeba mak atu manan maioria, maibe karik povu fo konfiansa mak sei garante programa neebe mak iha atu hodi dezenvolve rai no povu ida nee. Guilhermina Franco / Jacinta Sequeira

Suara Timor Lorosae