Pasiente TBC Tenke Hemu Aimoruk Iha Sentru Saude

DILI – Pasientes moras Tubercolouse (TBC) obrigatoriu tenke hemu aimoruk lor-loron iha sentru saude, neebe observa direita husi pesoal saude sira.

Tuir Xefe Unidade TBC Ministerio Saude, Constantino Lopes, ba STL iha nia servisu fatin Kinta (07/06/2017) hateten, tinan 2015 Ministeriu implementa estrategia tratamentu foun ida nee, tanba pasiente barak la hemu ai-moruk.

Uluk ai-moruk ita direita ba pasiente maibe pasiente sira la hemu, kuandu la hemu sira moras sai resistensia susar atu kura entau ami muda estrategia loron-loron sira tenke mai hemu aimoruk iha sentru saude,” esplika Cosntancio.

Nia hatutan, moras TBC persija fulan 6 ou liu atu kura tanba nee kuandu pasiente neebe hetan moras TBC mak hemu aimoruk la tuir regras ou rutina maka susar atu rekopera.

Ba pasiente neebe mak laiha kbit atu lao ba sentru saude maka ami servisu hamutuk ho voluntariu sira atu tuir hodi fo aimoruk pasiente nee hemu rutina. Maske la fasil tanba kestaun kondisaun, tempu, distansia, osan no transporte atu kombate moras TBC ami kontinua buka dalan atu pasiente sira bele diak lalais,” hatutan Constantino.

Nia informa taxa insidensia no mortalidade TB Timor –Leste primeiru lugar kompara ho nasaun 10 seluk iha regiaun Sudeste Asiatiku.

Ita hare ba Dadus nasional hatudu taxa insidensia iha 498/100,000 signifika husi ema nain rihun atus ida ema nain 498 mak identifika sofre moras TB kada tinan,” esplika Constantino.

Iha tinan 2008-2014 estrategia tratamentu iha faze rua, primeiru faze intensive hemu aimoruk fulan rua no faze segundu simu fali aimoruk Ethambutol no izonajida hemu iha uma durante fulan nen.

Iha fatin ketak Manuel Viegas nudar responsavel TB no Lepra saude Munisipiu Dili, konsidera estrategia foun nee efetivu tebes tanba numeru pasiente neebe kura aumenta.

Nia fo Ezemplu iha tinan 2016, munisipiu Dili iha kazu 472, husi numeru nee 85% mak hetan kura no 2% mak mate tanba grave ona.

Servisu kampania no edukasaun saude nafatin halao ba komunidade sira konaba moras ida nee. Atu elemina moras ida nee tenke haforsa servisu screening iha komunidade atu bele halo identifikasaun sedu no tratamentu atu labele daet fali ba ema seluk,” dehan Manuel.

Nunee mos responsavel Klinika Bairo Pite, Doutor Daniel Murphy hateten, privalensia moras TBC satan ba sosiedade Timor barak mak sei moris mukit.

“Ita kondisaun moris no ambiente iha Timor mos sai factor principal tanba, ema barak laiha hela fatin neebe adekuadu no familia hela hamutuk barak fasil hadaet moras nee ba malu,” afirma Daniel. Jeniche da Costa 

Suara Timor Lorosae