Diskursu Odio La’ós Parte Hosi Liberdade Imprensa

DILI, (TATOLI) – Prezidente Konsellu Imprensa (KI),  Virgilio Guterres husu ba meius komunikasaun sosiál (komsos) sira atu labele transmite diskursu ódiu ba públiku durante kampaña eleitorál.

“Diskursu ódiu ka vingansa polítika la’ós parte husi liberdade imprensa no liberdade espresaun”, Virgilio afirma iha konferénsia imprensa iha sala plenária KI, ohin.

Hodi dehan tan, objetivu husi kobertura mídia iha kampaña  eleitorál mak atu hasa’e partisipasaun sidadaun nian iha eleisaun jerál. Tanba ne’e, sidadaun sira tenke hetan informasaun ne’ebé klaru konaba programa partidu polítiku hodi hola desizaun molok vota.

Nia mós insiste ba jornalista sira atu husu líder partidu polítiku sira hodi esplika programa sira ho klaru hodi públiku bele kompreende ho di’ak.

“Jornalista sira labele ba grava no transmite de’it saida mak líder partidu polítiku sira ko’alia no promove iha palku kampaña  nian, maibé tenke husu no litik sira atu klarifika sira nia promesa didiak ba públiku”, tenik.

Iha ambiente polítika demokrátiku hanesan eleisaun, polítiku sira halo propaganda atu konvense povu hodi vota ba sira nia partidu.

Tanba ne’e, Prezidente KI husu ba jornalista sira tenke iha estratéjia rasik hodi kestiona asuntu balun ne’ebé partidu polítiku sira hato’o iha kampaña.

Jornalista: Julia Chatarina | Editora: Rita Almeida

Foto: Prezidente Konsellu Imprensa hatudu notisia falsa durante konferensia imprensa, ohin. Foto midia KI