Polisia Latolera GAM Treinu Subar

DILI - Komandu Jeral Polisia Nasional Timor-Leste (PNTL) sei latolera ba Grupu Arte Marjiais (GAM) neebe sei halo  treinu subar iha tempu kalan.

Lia-hirak nee hatoo husi Komandante Jeral PNTL Comissario Polisia,  Julio Hornay ba jornalista sira hafoin remata enkontru ho PR-Lu-Olo iha Palasiu Prezidensial Bairru-Pite, Kinta (7/9/2017).

Tuir Julio katak, sosialisaun lei no 5/2016 neebe regula Arte Majiais   oras nee dadaun husi komandu PNTL orienta ona ba iha komadadu PNTL munisipiu sira hodi halo sosialisaun lei ba komunidade sira.

Ita kontinua halo sosialissaun ba lei regula arte Marjias nee duni, oras nee dadaun husi sosialisaun nee rasik kontinua lao no mos operasaun kontinua lao. Tanba nee, husi parte PNTL bainhira hetan Arte Marjiais neebe halo treinu ita kaptura apresenta ba Ministeriu Publiku depois Ministeriu Publiku mak deside. Polisia  nian servisu mak halo operasaun  karik hetan Arte Marjias neebe viola lei no.5 hetan halo prosesu ba Ministeriu Publiku ba Tribunal depois tribunal mak deside,” katak Julio.

Tanba nee husu ba komunidade sira neebe hetan GAM neebe halo aktividade illegal informa ba PNTL tanba nee mak husu ba komunidae tenke kolabora ho PNTL.

Hanesan foin dadaun iha area balun polisia konsege detekta Arte Marjias halo treinu subar polisia kaer  apresenta ba Ministeriu Publika hodi halo julgamentu iha Tribunal,”dehan  Julio.

Iha fatin ketak Xefe Suku Comoro Eurico da Costa afirma, kuandu estadu hasai regulamentu ka lei sidadaun hotu-hotu tenki tuir tanba ita hotu iha lei nian okos lei mak boot hodi regula ita.

Tanba nee kuandu estadu deside ona taka Arte Marjiais nee signifika labele halo tan fali. Kuandu nunee mak husu autoridaade lokal no komunidade koopera liu husi servisu hamutuk hodi informa ba parte polisia atu halo prevensaun. 

Natalino Costa | Suara Timor Lorosae