Polisia Tranzito Dili Hatama $67.299.00 ba Kofre Estadu

Polisia Tranzito munisipio Dili hatama $67.299.00 ba kofre estadu hafoin halo rekolhamentu husi infrator sira ne’ebe viola regras tranzito nian husi fulan Janeiru to’o Marsu 2017 nia laran.

Komandante Tranzito munisipiu Dili, Inspektor Matias da Silva hateten violasaun ne’ebe infrator sira komete mak hanesan kontra regulamentu diploma ministerial artigu 5/2010 kona ba la uza farda, la kumpri sinais tranzito, laiha karta kondusaun, karta kondusaun liu prazu inklui xapa matrikula uza plastiku.

“Sira halo violasaun, entaun sira tenke selu koima direitamente iha Banku Nasional Ultramarinu [BNU],” nia hateten, iha Dili.

Kona ba reseita iha fulan Junhu nian, nia dehan seidauk iha relatoriu kompleto maibe rezultadu operasaun iha tempu kampanha ne’ebe sira halo iha dia 19-27, konsege prende motor inklui kareta hamutuk 580 ho total reseitas $8.666.00.

Nia informa, operasaun hanesan sei kontinua ho objetivu atu redus numeru infrator inklui asidente trafiku iha futuru.

Tanba, nia dehan sira halo bebeik ona edukasaun sivika ba motorista sira inklui kondutor maibe la konsege redus numeru infrator sira.

“Ami halo check point hotu, ami fo kedas edukasaun sivika maibe barak mak seidauk iha konsiensia entaun ami tenke halo check point ho rutina,” nia hateten.

Iha parte seluk Membru Parlamentu (MP), Cesar Valente espera katak check point rutina sei redus numeru inflator, tanba motorista sira sente tauk.

“Tanba sira nia motor ou kareta prende tiha depois selu tan osan, hau fiar ne’e bele halo sira tauk,” nia esperansa.

Maibe, nia sujere atu kontinua programa sosializasaun ne’e liu-liu ba estudante sira kona ba sinais tranzito hodi prevene asidente.

Venidora Oliveira | The Dili Weekly