Polisia Tranzito Dili Prende Motor Nafatin ne’ebe Uza Kanu Resin

Polisia Tranzito munisipiu Dili kontinua prende motor tanba uza kanu resin no operasaun ne’e halao iha territoriu laran tomak.

Komandante Tranzito munisipiu Dili, Inspektor Matias da Silva hateten operasaun ne’e bazea ba lei kodigu estrada numeru 6/2003 artigu 74 ne’ebe bandu atu utilize kanu resin iha motor, tanba viola direitu ema seluk ne’ebe hakarak ambiente ne’ebe hakmatek.

“Pur ezemplu, ema balun ba Cristu Rei atu refreshing, maibe iha ema seluk uza motor ho kanu resin halo barulhu entaun prejudika ona ema seluk nia direitu atu goza tempu ne’ebe hakmatek,” nia hateten, iha Dili.

Ba motoristas ne’ebe viola regras ne’e, nia dehan sei selu multa $100 inklui sobu sai kanu resin husi motor hafoin polisia fo fila motor ba nain.

Iha parte seluk Membru Parlamentu (MP) Anna Ribeiro hateten uza kanu resin iha motor la fo benefisiu ne’ebe diak tanba ne’e polisia presiza haforsa liu tan operasaun ne’e.

“Dala ruma iha bairu-bairu, joven sira uza kanu resin barulhu halo ema ladun gosta no labarik balun hakfodak no tauk,” nia dehan.

Alende ne’e, nia rekomenda atu fo mos sosializasaun ba komunidade liu-liu joven sira atu iha konesmentu kona ba impaktu no desvantagen utilizasaun kanu resin.

Venidora Oliveira | The Dili Weekly