Nivio: Prepara Joven Kualifikadu, Preparadu ba Kampu de Trabalho

Secretário de Estado da Juventude e do Trabalho, Nivio Magalhães halo vizita iha Centro Nasional de Empregu e Formasaun Profesional, ho objetivu atu halo fiskalizasaun direita nia funsionamentu no servisu funsionariu nian, iha loron 26/10.

“Hau tenki asegura centru ida ne’e funsiona duni, funsionariu sira iha ne’e servisu duni, hodi fo formasaun ba ita nia juventude sira ka ita nia adultu sira, objetivu seluk tan mak hodi haree mos fasilidade sira iha ne’e sufisiente ka lae, hodi nune’e fo apoiu ba formasaun, prepara kualifikadu preparadu ba kampu de trabalhu,” hateten Nivio.

Nivio informa mos katak presiza prepara didiak juventude sira, sei aumenta numeru estudante sira ne’ebe mai iha ne’e,  hodi nune’e bele preparadu kualifikadu, atu bele tama ba kampu de trabalho, tanba bainhira koalia dehan trabalhadores estranzeiru barak iha ne’e, hanoin bainhira halo limitasaun tenki prepara uluk rekursus humanus. SEJT husu ba funsionariu sira,hodi kontinua servisu ho diak, ho objetivu atu servi povu no nasaun.

Iha fatin hanesan Director Centru Nasional de Empregu e Formasaun Profisional Simão Tito Bareto ba Jornalista TAFARA.TL hanesan nasaun foun, instituisaun ida ne’e ho nia funsionariu tomak sei esforsu an, hodi halo tuir buat ne’ebe tula iha funsionariu centru ida nia kabaas.

Director Simão, informa katak, estudante ne’ebe mak tuir formasaun presija tau kustu ne’ebe mak sufisiente, atu bele kobre prosesu hotu ne’ebe maka iha,  hodi nune’e bele hasae kualidade estudante sira nian.

Funsionariu Formasaun Profesional Tibar, Herminia Ximenes hateten ba TAFARA.TL kaatk servisu refere laos deit mane mak halo, maibe feto mos bele halo servisu tekniku nian.

“Hau servisu iha ne’e tinan lima ona, servisu ne’e baibain ema dehan mane nian, maibe ba hau teknik ne’e ema haree liu ba generu, tanba ne’e servisu ida ne’e feto mos bele halo. Antes ne’e hau tuir kursu iha ne’e hotu, mak sira bolu fila fali ami atu mai servisu iha ne’e tanba iha ne’e kolega balun ho kondisaun isin rua mos nafatin servisu iha ne’e,” katak Hermínia.

Total Estudante Formasaun Graduadu husi 2002-2017 hamutuk 3720, kompostu husi feto no mane hosi municipios 12 no reziaun Espesial Oecusse Ambeno RAEOA, no hetan ona certifikadu profisional. Periodu ba tinan ida ne’e total 200.

Centru Refere kompostu husi Departamentu haat, hanesan Konstrusaun Civil, Eletrisidade, kanalizasun, karpinteria, pedrero ho soldadura. Iha mos Maritima, Hospitalidade e Turismo, Agrikultura, Auto Mekanika no Ekipamentu Pezadu.

Orsamentu hodi apoiu centru refere mai hosi orsamentu Jeral Estadu no mos hetan tulun hosi ajensia balun.

Bebiana Soares | Editor: Zevonia Vieira | TAFARA.TL | 26.10.2017

Foto: Iha Facebook Nivio Magalhães