Sasan Neebe Prende Lafo Fila

DILI – Bazea ba dekretu lei numiru 33/2008 bandu ema labele halo kualker atividade liuliu hanesan negosiu iha trotoar. Tanba nee bainhira ekipa Guarda Munisipiu Dili (GMD) kuandu halo operasaun mak hetan sedeit halo negosiu iha trotoar leten tenki prende hotu. Sasan neebe prende sei lafo fila ba nain.

Xefi Departementu Saneamentu Munisipiu Dili Domingos dos Santos Soriano informa ba STL iha Administrasaun Munisipiu Dili, Tersa (24/10/2017).

Tuir Domingos katak, sasan neebe hetan prende sei ofrese ba orfonatu hanesan oan-kiak, ho ema moras iha hospital, nee duni lafo fila ba nain. Tanba konsidera sira viola dekretu lei numiru 33/2008.

Dekretu lei Numiru: 33/2006 mos bandu ema labele harii uma iha baleta leten. Nee duni, komunidade neebe deit mak hakarak harii uma iha basleta leten GMD nafatin foti medidas katak sobu.

Tanba nee dikreitu lei numeru 33/2008 oras nee lao hela, tanba iha direitu lei nee atu regula ema labele faan sasan iha trotoar leten, halo uma iha baleta leten no halo uma besik liu ba estrada inklui bandu sidadaun neebe deit labele husik animal livre iha Kapital Dili.

Tanba nee, GMD sempre halo operasaun hodi kontrola animal hakiak neebe nai husik livre.

Maske nunee katak, Domingos, atu alkansa orden nee ba oin presiza mos ekipamentu hanesan transporte. Tanba dadaun ekipamentu limitadu nee duni sira ladun halo kontrola ba ema neebe faan sasan iha trotoar leten no halo uma iha baleta leten.

Maibe informasaun nee xefi suku no xefi aldeia sira iha Dili laran hatenee, tanba sira halo kontrola prende ema neebe faan sasan iha trotoar leten inklui prende mos animal hakiak neebe nain husik livre. Xefi suku no xefi aldeia, sira hamutuk mak ba prende sasan sira nee.

Parte seluk ekipa Saniamentu mos sempre halo sosialisasaun no avisu ba komunidade sira katak, labele faan sasan iha trotoar leten, labele halo uma iha baleta leten no husik animal livre iha sidade laran.

Maibe komunidade balun kontinua faan sasan iha trotoar leten no husik animal livre iha Dili laran. Tanba nee, bainhira saneamentu ou orden publiku hetan pasensia tenki prende sasan sira nee sira sei lafo fila ba nia nain, tanba sira kontra lei neebe mak iha.

Xefi Suku Kaikoli Hipolito Marques Sarmento mos dehan, durante nee governu implementa dikreitu lei numeru 33/2008 sorin balun deit, hanesan sansaun ba multa ba ema neebe soe lixu arbiru ida nee seidauk implementa. Maibe governu agora tenki aplika lei nee ho regrosu, nunee mos fo kompetensia ba xefi suku sira atu aplika dikreitu lei neebe mak iha, tanba dala barak xefi suku sira koalia deit ema lafiar.

Tuir observasaun STL nota katak komunidade kontinua harii uma latuir lei neebe iha. Maibe Ministeriu Obras Publiku Transporte no Komunikasaun (MOP-TK) lakontrola.

Tanba nee ho uma neebe harii arbiru inklui moru ninia inpaktu taka bee dalan. Tanba nee iha tempu udan bee labele sulin liu, hodi fo impaktu ba inundasaun, tanba sistema kontrola halo uma iha Dili laran laiha. 

Augusto da Costa | Suara Timor Lorosae