Fo Lisensa Provizoriu ba Transporte, Agente Polisia 3 Hatan Tribunal

DILI – Tribunal Distrital Dili julga agente polisia nain 3, tanba halo lisensa provizoriu ba transporte sira neebe halao atividade publika hanesan tula pasajeiru iha Munisipiu Liquica.

Tuir akuzaasaun neebe tribunal lee sai husi Ministeriu Publiku katak, arguida Virginia dos Santos nudar Ajente PNTL no servisu iha sesaun munisipiu Liquisa, hahu iha tinan 2015 too Janeiru tinan 2017. Arguidu Joao Martins nudar adjuntu xefi tranzitu PNTL iha munisipiu Liquisa, hahu iha tinan 2015 too fulan Agustu tinan 2016. Arguidu Trindade Mali Da Silva, xefi tranzitu PNTL, iha municipiu Liquisa hahu husi tinan 2015 too Marsu tinan 2017.

Iha fulan Jullu tinan 2016, arguidu Trindade fo orientaasaun ba arguidu Joao no Virginia atu prepara dokumentu lisensa provizoriu ba transporte sira neebe halao atividade publika hanesan tula paasajeiru sira iha municipiu Liquisa.

Arguidu sira deside katak, bainhira emite dokumentu provizoriu ida, sei selu kustu administraasaun nian ho montante USD $ 50.00. No arguidu sira hahu prepara dokumentus.

Iha loron 14 fulan Jullu tinan 2016, arguidu sira emite lisensa provizoriu ba transporte 3 ho kustu administraasaun nian $ 50.00 husi Arguidu Aurendino Dos Santos, Julio Alves Dos Santos, Jacinto Ramos Dos Santos.

Iha loron 15 fulan Jullu tinan 2016, arguidu sira emite lisensa provizoriu ba kareta rua ho kustu administraasaun $ 100.00 husi lezadu Jong no Joaquim Barros Soares.

Iha loron 18 fulan Jullu tinan 2016, arguidu sira emite lisensa provizoriu ba kareta rua ho kustu administraasaun $ 100.00 husi lezadu Eva no Olderico Araujo da Costa.

Iha loron 20 fulan Jullu tinan 2016, arguidu sira emite dokumentus lisensa ba transporte haat ho kustu ba administraasaun $ 200, husi lezadu Filipe Correia Goncalves, Maria Dos Santos Lopes, Alarico Dos Santos, no Jose.

Iha loron 22 fulan Jullu tinan 2016, arguidu sira emite dokumentus ba transporte 3 ho kustu administraasaun $ 150, husi lezadu Romuladu Amarak, Acacia De Jesus Trindade, no Mario Bonifaasio Ximenes.

Iha loron 27 fulan jullu tinan 2016, sira emite dokumentus ba kareta 6 ho kustu adminitraasaun $ 300.00, husi lezadu Manuel Godinho Tilman, Domingos Dos Santos, Jaasinta Da Silva, Joanico Bruno Martins, Augusto Bere, Armando Correia.

Iha loron 03 fulan Agustu tinan 2016, emite dokumentus ba transporte ida ho kustu administraasaun $ 50.00. Iha loron 8 fulan Agusto tinan 2016, sira mos emite dokumentus ba transporte ida ho kustu $ 50.00.

Iha loron 11 fulan Agusto tinan 2016, sira emite transporte ida ho kustu $ 50.00 no mos iha loron 17 sira mos emite transporte ida ho kustu $ 50.00. Iha mos fulan Dezembru tinan 2016, sira emite transporte ida ho kustu $ 50.00.

Maibe antes nee, iha loron 14 fulan Dezembru tinan 2015, Joao Martins emite no aasina ona dokumentu lisensa provizoriu ba kareta ho marka Suzuki, ho kustu administraasaun $ 50.00 husi lezadu Hermenio Da Silva Xavier.

Husi dokumentus lisensa provizoriu neebe emite husi arguidu sira dala 26, no konsege rekolha kustu ba administraasaun nian ho montante global $ 1300.00.

Ho montante refere, arguidu sira fahe tiha ba malu, no uza ba sira nia aproveitu raasik, neebe tuir lolos sira la iha direitu ba osan montante refere.

Arguidu sira halo hahalok nee ho grave, no viola nia dever nudar ajente PNTL no estadu nia funsionariu, neebe iha knar atu halao servisu tuir lei.

Ho faktus hirak nee, Ministeriu Publiku akuza arguida Virginia Dos Santos, Joao Martins, Trindade Mali Da Silva, hanesan ko autor material ho forma konsumadu ba krime uzurpaasaun ba funsaun, iha artigu 195 kodigu penal, no mos konkuru ba krime pekulatu iha artigu 295 kodigu penal.

Hatan ba akuzaasaun nee, arguida Virginia Dos Santos, deklara ba tribunal katak, faktus hirak nee los hotu.

"Hau simu ordem verval husi xefi tranzito nian Trindade atu prepara dokumentu, maas antes nee ami hetan prifing husi xefi katak, servisu neebe halao hanesan emite osan husi kareta sira nee, atu bele tau hamutuk hodi hadia sala tranzitu nian, no mos hadia aceh neebe sei aat hela, no dokumentus nee Joao mak prepara, aasinatura husi xefi Trindade,” deklara arguida iha Sala Audensia Tribunal Distrital Dili, Tersa (24/10/2017).

Nia deklara tan, tuir lolos nee DNTT nia servisu mak ida nee, maibe tanba hetan deit ordem husi xefi nia halao, maibe tuir lolos ida nee mos kontra lei.

Alende nee, arguidu Joao Martins deklara katak, iha loron 12 fulan Jullu  tinan 2016, komandate tranjitu orineta nia dehan katak, bele fo lisensa ba kareta, maibe nia hatan kedan ba komandante katak, nee DNTT nia servisu.

Nia deklara tan, konaba dokumentus neebe urus ba mai nia la hatene, no mos konaba kustu administraasaun neebe hetan husi kareta nia hatene deit mak $ 20.00 neebe nia simu.

Rona tiha deklaraasaun tribunal adia fali julgamentu ba iha loron 14 fulan Novembru tuku 16:00 hodi rona fali deklaraasun husi arguidu seluk.

Audensia julgamentu nee, prezide husi juis kolektivu, juiza Edite Palmira, juiza Ana Paula, juis Eusebio Xavier, Ministeriu Publiku reprezenta husi prokurador Rogerio Viegaas Vicente, arguidu sira hetan aasistensia legal husi defensor publiku Manuel Sarmento.*

Suara Timor Lorosae