UNICEF | Angola ho Guiné-Bissau entre nasaun sira ho taxa mortalidade infantil aat tebes

Timor-Leste rejista na'in 50 iha taxa ba mortalidade infantil

Angola ho Guiné-Bissau tama iha grupu hosi nasaun sira ne'ebé iha taxa aat tebes ba mortalidade infantil to'o tinan lima, haktuir hosi relatóriu ne'ebé fó sai iha loron-kinta ne'e hosi UNICEF.

Iha Guiné-Bissau, labarik na'in 88 mate ona entre labarik rihun ida ne'ebé maka moris iha tinan liubá. Iha Angola, númeru hosi labarik sira ne'ebé mate maka na'in 83, haktuir hosi dokumentu.

Somália, ho labarik na'in 133 mate entre labarik rihun ida ne'ebé moris, hanesan nasaun ne'ebé iha rezultadu aat liu iha mundu. Tuir Xade (na'in 127), Repúblika Sentru Afrikanu (na'in 124), Serra Leoa (na'in 114), Mali (na'in 111), Nijéria ho Repúblika Demokrátika Kongo (na'in 94), Benim (na'in 98), Níjer ho Guiné Ekuatorial (na'in 91).

Nasaun luzófonu afrikanu sira seluk iha rezultadu ne'ebé pozitivu liu: Mosambike rejista na'in 71 mate entre labarik rihun ida, iha São Tomé & Prínsipe na'in 34 no iha Cabo Verde na'in 21.

Iha Brazil, rejista na'in 15 no iha Timor-Leste na'in 50. Iha Portugal, númeru maka na'in haat entre labarik na'in ida ne'ebé moris.

Tuir relatóriu hanesan, labarik rihun 15 resin ne'ebé seidauk to'o tinan lima mate ona iha tinan 2016 iha mundu tomak no 46% hosi vítima sira mate iha loron 28 dahuluk hafoin moris.

Maski rejista ona diminuisaun hosi mortalidade iha tinan lima dahuluk moris nian, hosi millaun 9,9 ne'ebé mate iha 2000 ba millaun 5,6 iha 2016, númeru hosi kosok-oan sira entre sira ne'ebé mate aumenta hosi 41% ba 46% iha períudu ne'e.

"Dezde tinan 2000 salva ona moris labarik sira ne'ebé seidauk iha tinan lima hamutuk millaun 50, sasin ida hosi kompromisu sériu hodi hasoru mortalidade infantil ne'ebé maka bele evita", hatete hosi xefe saúde Unicef nian, Stefan Swartling Peterson, iha komunikadu.

"Maibé, ita tenki halo liután hodi bele evita atu kosok-oan sira mate iha nia loron moris, progresu ne'ebé seidauk kompletu. Ita iha koñesimentu no teknolojia ne'ebé nesesáriu, presiza de'it atu bele to'o iha ema sira ne'ebé presiza", nia hatutan.

Relatóriu kalkula katak, bainhira kontinua ho tendénsia ne'e, labarik sira ne'ebé seidauk to'o tinan lima hamutuk millaun 60 sei mate entre tinan 2017 no 2030.

Estudu ne'e halo hosi Grupu Interinstitusional ba Estimativu hosi Mortalidade Infantil ONU nian, ne'ebé inklui Unicef, Organizasaun Mundial Saúde nian no Banku Mundial.

"Maski iha progresu, sei iha diferensa maka'as iha sobrevivénsia infantil entre rejiaun sira no nasaun sira. Maibé, mate sira iha tinan ne'e dalabarak bele evita ho intervensaun di'ak sira, antes, durante no hafoin moris", hatete hosi sub-sekretáriu ba Asuntu Ekonómiku no Sosial hosi ONU, Liu Zhenmin.

Áfrika subsarianu reprezenta ona 38% hosi kosok-oan sira ne'ebé mate iha mundu.

Kauza sira mate nian maka pneumonia ho diareia, hanesan responsável tui 16% no 8% hosi mate sira, entre labarik sira ne'ebé seidauk iha tinan lima.

SAPO TL ho Lusa