Maioria
hosi komunidade LGBTI iha Timor-Leste hetan ona violénsia no abuzu psikolójiku
no fíziku, inklui obriga kaben ho violénsia hodi "hadi'a" identidade
seksual, haktuir hosi estudu dahuluk kona-ba komunidade timoroan ne'e.
Relatóriu,
ne'ebé fó sai semana ne'e, halibur sasin oioin hosi abuzu psikolójiku ho
fíziku, inklui violénsia doméstika, obriga kaben ho tentativa kaben nian ne'ebé
halo hosi membru sira família nian, muda orientasaun seksual no identidade hosi
jéneru ema sira nian.
Ezamina
mós fatór sosial ho ekonómiku, hanesan dependénsia finanseiru hosi família
sira, no oinsá maka afeta sira nia moris iha sosiedade timoroan nian, rekomenda
ba Governu no ba sosiedade sivil hodi fó liután apoiu ba feto lésbika sira no
biseksual sira no ba mane transeksual sira, kria "oportunidade hodi
aumenta sira nia kapasidade hodi bele tulun sira sai hanesan defensor prinsipal
sira hosi sira nia direitu rasik".
Estudu
dahuluk kona-ba feto lésbika no biseksual sira nia moris no kona-ba mane
transeksual sira iha Timor-Leste hala'o hamutuk hosi organizasaun timoroan Rede
Feto no hosi ASEAN SOGIE Caucus, ne'ebé luta ba direitu sira hosi LGBTI
(lésbika, gay, biseksual, transeksual ho interseksu) iha sudeste aziátiku.
Mane
ho feto sira ne'ebé tuir estudu ne'e hatete ona katak sira hetan asaun
violénsia homofóbiku maka'as, dalabarak hosi família rasik ne'ebé aleinde abuzu
fíziku sira, halo mós sira moe iha viziñu sira no iha komunidade sira.
"Kesi
ha'u iha karreta ida nia kotuk no arasta ha'u iha estrada hodi ema hotu
haree", konta hosi ema ida ne'ebé entrevistadu.
"Ha'u
nia maun kesi ha'u, dada ha'u, tenta tara ha'u ho mangeira ida no tau ha'u iha
tanki ida nakonu ho bee iha oras barak nia laran. Ha'u tenta beibeik atu oho
aan", hatutan ema ida seluk.
Ema
sira ne'ebé entrevistadu barak maka tama beibeik iha hospital no balun to'o
ohin loron iha fitar hosi violénsia sira ne'ebé sira hetan ona.
Iha
relatu barak, liuliu hosi feto sira, iha parte hanesan bainhira sira tenta
ko'alia kona-ba tentativa hosi família sira hodi "muda" sira ba
heteroseksualidade ho dalan "kruel", inklui obriga sira hemu manu nia
raan hodi "hamoos sira".
Feto
barak ko'alia katak sira hetan violasaun hosi família sira hodi
"koriji" sira.
"Ha'u
hetan violasaun hosi ha'u nia tiun rasik ne'ebé hatete katak nune'e bele muda
ha'u nia orientasaun seksual, obriga ha'u ba relasionamentu heteroseksual.
Ikusmai, ha'u isin-rua maibé ha'u konsege medisina tradisional hodi halo abortu
ida. Hafoin ne'e ha'u halai sai hosi uma no moris ho belun sira", konta
hosi feto ida seluk.
Estudu
hatudu katak membru barak hosi komunidade LGBT timoroan manán oituan ka iha
susar hodi hetan serbisu, ho feto sira - ne'ebé sai hanesan alvu violénsia iha
Timor-Leste - senti liután difikuldade sira.
Ryan
Silveiro, kordenador rejional hosi ASEAN SOGIE Caucus, hatete katak relatóriu
ne'e hakarak ajuda reforsu hosi movimentu LGBTI iha Timor-Leste, nasaun ne'ebé
hala'o ona nia marxa Orgullu dahuluk iha tinan ne'e.
"Maski
iha esforsu sira hosi advokasia ne'ebé halo daudaun hodi promove direitu sira
hosi ema sira LGBTI nian, ami hatene katak feto lésbika sira, biseksual sira,
no mane sira transeksual sai marjinalizadu. Relatóriu ne'e hamosu naroman ida
ba sira nia problema no buka aumenta espasu polítiku sira iha futuru hodi sira
bele halo parte", nia esplika.
Iram
Saeed, autor ida hosi relatóriu, konsidera ona investigasaun hanesan
"esforsu pioneiru iha Timor-Leste nia istória" ne'ebé serve hodi fó
koñese realidade hosi komunidade ida ne'ebé kontinua hetan violasaun sira ba
sira nia direitu ema nian.
"Hanoin
ona hodi uza rezultadu sira iha plataforma nasional no rejional sira hodi
aumenta konsientizasaun kona-ba kestaun sira hosi direitu LGBTI nian", nia
esplika.
SAPO
TL ho Lusa
Sem comentários:
Enviar um comentário