HAK: Mangoñas Tribunal-PN iha Kazu Vicente Guterres

DILI: Haruka karta ba-mai, husi tribunal ba Parlamentu Nasionál no kontrariu, hodi hasai imunidade deputadu Vicente Guterres husi bankada CNRT hanesan laiha rohan.

Molok ne’e, Juiz Prosesu Tribunal Distrital Dili haruka ona karta korespondensia ba Parlamentu Nasionál hodi husu atu hasai imunidade eis Prezidente PN Vicente Guterres maibé tanba karta ne’e dirije fali ba vise prezidente, PN haruka fila fali ba tribunal ho razaun la tuir irarkia orgaun soberania ne’e nian.

Ho nune’e iha semana hirak kotuk, tribunal haruka tan karta ne’ebé dirije direita ba prezidente PN. Hafoin simu karta ne’e, meza PN baixa ba komisaun A asuntu lejislasaun, justisa no imunidade hodi analiza.

Prezidente Komisaun A Carmelita Monis hatete, hafoin analiza karta haree katak la kompletu tanba laiha akuzasaun tan ne’e nia parte haruka fila fali ba tribunal hodi kompleta.

Ba kestaun ne’e, Diretór Asosiasaun HAK Manuel Monteiro konsidera mosu ona mangoñas (sandiwara) ba kazu deputadu Vicente Guterres.

Tuir nia, Tribunal no PN tuir prinsipiu fundamental ne’e atu garantia estadu diretu demokratiku.

“Tribunal no PN hatene atende kazu sira hanesan maibé sira mak hakarak halo mangoñas (sandiwara) hodi dada kazu ne’e,” dehan Manuel iha nia knar-fatin, FarolDili, Kuarta (27/12).

Tuir nia, loloos PN tenke loke an, bainhira iha alegasaun ruma husi tribunal hasoru deputadu ida, tenke hasai nia imunidade atu ema ne’e bele ba hatan iha tribunal nune’e povu ki’ik mós sente justisa ne’e ba ema hotu.

Manuel hatete, bainhira membru orgaun soberania sira la hakruk ba lei ne’e hanesan aktu ida ne’ebé bele kontribui ba krime.

“Ami nia haree sira laiha vontade, sira hakarak asegura malu,” deklara nia.

Diretór ne’e dehan, ema ki’ik no boot iha lei nia oin tenke hanesan. Kuandu ema boot ida mak komete kazu ruma prosesu penal tenke kona nia.

Jacinto Xavier | Independente