AMP Husu Aniceto Entrega Kargu ba Vise-Prezidente PN

DILI: Bloku opozisaun Aliansa Maioria Parlamentár (AMP) konsidera funsionamentu Parlamentu Nasionál husi sesaun plenária paradu tanba la iha ajendamentu diskusaun. Ne’e duni, husu ba Prezidente PN, Aniceto Guterres, atu entrega kargu ba Vise-Prezidente hodi lidera.

Bloku opozisaun ezije ida ne’e tanba sente Prezidente PN ladún iha ona vontade atu lidera instituisaun ne’e.

“Karik Prezidente Parlamentu Nasionál laiha ona vontade bele entrega kargu ne’e ba Vise-Prezidente sira atu asume funsionamentu Parlamentu Nasionál”, dehan Prezidente Bankada Partidu Libertasaun Populár (PLP), Fidélis Magalhães, iha Uma Fukun PN, horisehik.

Bazeia ba artigu 22 Rejimentu PN bele delega kompeténsia ba Vise-Prezidente na'in rua atu prezide plenária hodi funsiona funsionamentu PN.

Iha fatin hanesan, deputadu Juvinal Mericio Akara, preokupa mós ho rezultadu fiskalizasaun husi komisaun espesializada sira nian ne'ebé durante ne’e hala’o ona maibé rai de'it labele hato’o iha plenária.

Hataan ba ne’e, Prezidente Bankada FRETILIN Francisco Branco, hatete funsionamentu plenária laiha ne’e tanba lider bankada sira seidauk halo konferénsia hodi halo ajendamentu ba diskusaun.

Kona-ba funsionamentu komisaun espesializada sira mós la la’o tanba komisaun sira ne’e kuaze deputadu husi opozisaun mak lidera.

Aktu ne’e AMP halo tanba hakarak atu hadau podér husi VII Governu. Tanba ne’e, sira boikota hotu funsionamentu komisaun nian hodi kria krize institusionál nune’e obriga Prezidente Repúblika atu halo lalais ona desizaun entrega podér ba sira atu ukun.

Situasaun polítika la’o nune’e nafatin, osan laiha, dezenvolvimentu la la’o, dalan úniku mak fó fila ba povu atu deside tanba ukun ne’e povu nian.

Jacinto Xavier | Independente