ETV Bekora Sei Sai Eskola Referénsia

DILI, (TATOLI) – Ministru Edukasaun, Fernando Hanjam, halo vizita ofisiál ba Eskola Tékniku Vokasionál (ETV), Grupu Teknolojia no Indústria, Bekora ohin no observa direta funsionamentu no laboratóriu eskola ne’e nian.

“Nia laboratóriu hotu-hotu kumpletu. Iha fatin ida ne’e mós sei foti sai hanesan eskola referénsia”, dehan ministru Fernando ba jornalista sira hafoin vizita.

Nia hatutan tan laboratóriu kumpletu estudante sira finalmente bele halo buat ruma, nune’e nia tenta sei lori hodi relata iha Konsellu Ministru.

“Mas tenke halo prepara didi’ak iha ne’e, hafoin ita bele lori buat ne’e ba iha Konsellu Ministru no fim ita bele halo buat ida ne’e”, akresenta. Ita haree buat hotu kumpletu. “Importante mak laboratóriu tanba ita loke ona eskola tékniku ita mós tenke prepara laboratóriu”.

Diretór ETV, Francisco Guterres, hateten hanesan responsável másimu ba ETV hamutuk ho profesór nomós estudante sira sente orgullu tebes ho vizita ida ne’e maske prezensa ne’ebé mak simples maibé iha sentidu boot.

Kona-ba ministru nia afirmasaun ETV sei sai referénsia ida ba eskola sira seluk mak diretór ne’e informa ETV dezde uluk kedas sai ona referénsia ida ba eskola Tékniku Vokasionál hotu-hotu iha Timor laran tomak.

“Dala ida tan orgullu ho prezensa ministru nian hodi fortifika lala’ok ida ne’e i ami hamutuk ho profesór sira eskola Tékniku Vokasionál, Bekora ne’e, ho mensajen ida ne’e lori ona, inspira ona ami profesór sira atu bele dedika ninia aan di’ak liu ba eskola tékniku vokasionál ne’e”, realsa.

ETV Implementa OPK

Diretór ETV, Francisco Guterres hatutan mós sistema orientasaun ne’ebé sira implementa iha eskola tékniku ne’e diferente ho eskola sira seluk katak uza programa OPK (Programa, Kuñesimentu no Ambiente).

“Programa ida ne’e mak aplika ba ami-nia estudante sira ne’ebé mak foun ano létivo 2018 nian”, akresenta.

Nia esplika programa OPK ne’e mak oinsá estudante sira kumprende, kuñese siénsia teknolojia, indústria. Segundu konvida departamentu hotu-hotu atu ko’alia kona-ba área sira ne’ebé mak estudante agora dadauk hamahan aan ba.

Terseiru, siramós konvida igreja, Polísia Nasionál Timor-Leste (PNTL), Diresaun Nasionál Tékniku Vokasionál ministériu nian mai ko’alia, palestra iha programa ida ne’e atu oinsá motiva estudante sira ne’ebé mak agora dadauk mai iha ETV.

Tanba ETV halibur ema ne’e, la’ós de’it iha Dili laran maibé mai husi munisípiu 13 ho karaktér diferente entaun, uza oportunidade OPK ne’e bele kria ambiente ida ne’ebé mak ho amizade entre profesór, estudante sira hodi nune’e tama ba prosesu ensinu aprendizajen karik estudante adapta tiha ona ho ambiente ne’ebé ETV iha.

Diretór ETV, Francisco Guterres relata profesór sira iha ETV hamutuk na’in 83; kompostu husi profesór sira mai husi programa sosiál-kulturál, programa sientífiku nomós programa produtivu.

“Profesór hirak ne’e, na’in walu mak agora dadauk hala’o hela sira-nia bolsu estudu, mestradu iha área tékniku. Iha ami-nia eskola ne’e mestradu hamutuk na’in lima”, relata.

Kona-ba estudante. “Totál estudante iha ETV, Bekora hamutuk mil quarenta, kompostu husi décimo ano, décimo primeiro no segundo ano i ohin loron décimo ano hahú ona, finaliza orientasaun”, hato’o tan.

ETV Bekora, antes ne’e, Diretór KOICA ba Timor-Leste, Hyeoncheol, haktuir iha 2013 KOICA apoia ona ETV ho fundu USD milaun sia hodi dezenvolve livru didaktiku no livru ensinu formasaun nian inklui rehabilita edifísiu 18 (7.400 m2) hodi prepara kondisaun ne’ebé di’ak atu nune’e aprende teknolojia ho di’ak liu tan. Husi milaun sia ne’e, milaun ida mai husi governu Timor-Leste via Ministériu Edukasaun.

Jornalista: Rafy Belo | Editora: Rita Almeida