Pakote AMP, Laimpaktu Kadeira Khunto-CNRT

DILI – Aliansa Maioria Parlamentar (AMP) sei avansa pakote ida ba Eleisaun Antisipada (EA), sei laimpaktu ba kadeira partidu Khunto, no CNRT.

Kestaun nee hatoo husi Xefe Bankada Khunto Luis Roberto da Silva katak, sira avansa pakote ida, maibe sei laimpaktu ba kadeira Khunto iha PN, tanba nee sira  sei lahan malu tan kadeira, tanba AMP unidade neebe fiar katak depois kongresu halao nee sei satifaz ba partidu 3.

“Hau hanoin katak AMP avansa pakote sei laiha impaktu ba ami nia kadeira iha partidu Khunto, tanba ami iha AMP, ami avansa ho lista uniku  ba EA, i ami tuun ba baze sei laiha impaktu ba ami nia kadeira,” katak Xefe Bankada Khunto ba Jornalista Tersa (13/02/2018) iha PN.

Oinsa kona ba AMP fahe kadeira nee oinsa Luis hatete, ida nee depois halo kongresu nasional mak sei prepara lista ba kandidatura, atu nunee partidu 3 nee tuur hamutuk hodi deside. I kongresu nasional nee sei hein prezidente CNRT maun boot Xanana Gusmao mak halao.

Nunee mos Xefe Bankada CNRT Arao Noe hatete, AMP avansa pakote ida nee sei impaktu ba CNRT kalae Arao hatete, sira partidu 3 halibur iha AMP nee hotu-hotu preokupa, tanba CNRT, PLP, Khunto hakarak mantein nafatin identidade partidu ida-idak nian.

Nia dehan, partidu 3 halibur malu iha AMP para infrenta deit situasaun ida agora atu nunee moris inserteza nee bele ultrapasa lalais. Neebe se AMP manan promete dentru fulan ida bele rezolve situasaun hanesan forma governu, aprezenta programa, orsamentu estadu 2018 halao iha fulan ida.

Guilhermina Franco | Suara Timor Lorosae